फ्रान्सयात बुकूसें स्पेन यूरोकपया सेमीफाइनलय्

यूरोकप फुटबल अन्तरगत वंगु चान्हय् युक्रेनया डोनेत्सक रंगशालाय् जूगु क्वाटरफाइनल कासाय् थःगु कासा त्याकूसें साविक विजेता स्पेन सेमीफाइनलय् दुहांवंगु दु ।

निक्वः तकया विजेता फ्रान्सलिसे जूगु कासाय् स्पेन शुरुनिसें हे आक्रमक खनेदुगु खः । कासाय् स्पेनं फ्रान्सयात निगू गोलं बुकाः सेमीफाइनलय् थःगु थाय् पक्का याःगु खः । कासाय् मिडफिल्डर जाभी एलोन्सो नायक सावित जूगु खः ।
उगु कासाय् निगुिलं गोल स्पेनिस क्लब रियल मेडि्रडपाखें म्हितीम्ह एलोन्सों याःगु खः ।

आः लगातार स्वक्वः खुसी तःधंगु अन्तराष्ट्रिय उपाधि त्याकेगु झ्वलय् वनाच्वंगु स्पेनं फाइनलय् दुहांवनेगु लागि वइगु बुधवाः डोनेत्सक रंगशालाय् पोर्चुगल लिसे धेंधेंबल्ला याइ ।

थुगु कासा अन्तरगत अन्तिम क्वाटरफाइनल कासाय् आइतवाः चान्हय् न्हापांखुसी उपाधि त्याकेगु झ्वलय् लानाच्वंगु इंग्ल्याण्डं इटाली लिसें धेंधें बल्ला याइ ।

More Stories Like this