नेवाः विरोधीतय्त ब्वलासायेमाः
सम्पादकजु,
वंगु जेठ १८ गते कुन्हु नेवाः स्वायत्त राज्य मंकाः संघर्ष समितिया ग्वसालय् जूगु नेपालमण्डल बन्द सकल नेवाःतय्गु कुतलं ताः हे लाःवंगु दु । थ्व फुक्कं ग्वसाः खलःया लिसें सकल नेवाःतय्गु कुतलं खः । गुगु बन्द मनूतय्सं बिचाः हे मयाःकथं जूवना बिउगुलिं यानाः छगू कथं ऐतिहासिक बन्द धाःसां पाइ मखु । थुगु बन्दं नेवाःत मदंतले दनी मखु दन धाःसा बांमलाक हे दनी धइगु दसि क्यंगु दुसा नेवाः विरोधीतय्त छुमां नं बिउगु दु । उकिसनं आपाः नेवाःतय्सं छपाँय् छधी जुयाः ऐक्यवद्धता क्यँसें ब्वति कयाः थुगु बन्द ताः लाःवंगु खः । उकिं दकलय् न्हापां ग्वसाः खलः व सकल नेवाःतय्त सुभाय् बियाच्वना । थुकथं हे झी नेवाःत मालीगु इलय् कुहाँ बयाबिल धाःसा पक्कां नं झीसं थःगु अधिकार स्वायत्त राज्य काये फइ धइगु भलसा कयाच्वना । तर छम्ह निम्ह नय्क्वाझंगः वा वपाखें कुसां कुया जुईपं व नेवाः जुयाः नं नेवाः विरोधी नेवाःत दःसा छुं पाइ मखु । बरु अज्याःपिंनाप होशियार जुयाः च्वंच्वनेमाःगु दु ।
उकुन्हु हे बन्द याकेगु झ्वलय् कुलेश्वरय् गुगु नेवाः विरोधी छथ्वः कुतत्वतय्सं आकाझाकां सांघातिक हमला याः वल व तसकं दुःखया खँ खः । उमिगु कय्ता मदुगु ज्यायात थुगु पौपाखें विरोध प्वंकाच्वना । बरु अज्याःपिं कुतत्वतय्त मंकाः संघर्ष समितिइ दुथ्यानाच्वंगु खलः पुचःतय्सं व झी नेवाःतय्सं गबलें हे सह यानाच्वने मजिउ । थुकिया ब्वलासायाः अज्याःपिंत मात्तु मालाःसां साये हे माः । छाय्धाःसा झी नेवाःतय्गु निंतिं क्षरापति ल्वय् सिबें नं ग्यानापुपिं खः । थज्याःपिं दयाच्वंत्तले झीत न्ह्याबलें पंगःत वयां च्वनी । थज्याःगु पंगःतय्त झीसं चीका छ्वये हे माः । थज्याःपिं विरोधीतय्त क्षमा बियाः सुम्क च्वनेगु धइगु हे झीत झीसं हे लाकामं प्यंकाच्वनेगु थें जुइ । फःसा सकल नेवाःतय्गु न्ह्यःने थनाः थुकिया ब्वला साये हे माः ।
पुष्परत्न ताम्राकार 'स्वीटहर्ट’
३०५/४७ न्यत काय्गःननि
योगविर सिंह मार्ग
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
