एमालेपाखें ७ प्रदेशया प्रस्ताव

जनजातितय्त ल्वाकेगु डिजाइन

येँ (झीगु स्वनिगः)
एमालें बहुपहिचान धकाः आदिवासी जनजातितय्त थवं थवय् ल्वाकेगु कथंया प्रदेश निर्माण यायेगु प्रस्ताव याःगु दु । पार्टीया केन्द्रीय ज्याकू बल्खुइ च्वंगु स्यायी समितिया मुँज्यां म्हिगः उगु कथं निर्णय याःगु खः । बहु पहिचानया आधारय् धकाः प्रस्तावित प्रदेशत किराँत—लिम्बुवान—कोशी प्रदेश, ताम्सालिङ—नेवाः—वागमती प्रदेश, मगरात—तमुवान गण्डकी प्रदेश, भेरी—कर्णाली प्रदेश, सेती—महाकाली प्रदेश, मिथिला—भोजपुरा—जनकपुर प्रदेश, व थारुहट—अवध—लुम्बिनी प्रदेशया प्रस्ताव याःगु दु ।

एमालें आयोगया माध्यमं संविधान दयेकेमाःगु संसदया निर्वाचन यानाः आयोगं दयेकीगु संविधानयात अनुमोदन यायेमाःगु प्रस्ताव तःगु दु । अथे ल्वाकःब्वाकः यानाः जनजातित निथ्वःनिथ्व तयाः नापं भौगोलीक नां नं तयाः प्रदेश दयेकेफत धाःसा कन्हय् वनाः छगू जनजातिया नां यात मेगु जनजातिपाखें अस्वीकार याइगु अवस्था ब्वलंकेगु अले अन्ततः निगू नं जातिया नां लिकयाः पहिचानया आधारय् धकाः भौगोलीक नां तयेगु डिजाइन कथं हे एमालें उगु कथं ७ प्रदेशया प्रस्ताव याःगु खः धकाः टिप्पणी यानाहःगु दु ।

गथे कि ताम्सालिङ—नेवा—वागमती प्रदेशय् नेवाः न्ह्यःने तयेगु ला कि तामाङ न्ह्यःने तयेगु धैगु सवालय् नेवाः व तामाङतय्त ग्वाकाः ल्वाकेगु अले अथे जातीय नां तलकी ल्वापु जुइ धकाः दथुइ च्वनाः भौगोलिक नां जक तयेमाः धकाः बागमती प्रदेश धकाः यंकेगु एमालेया ब्रम्हुवादी नेतातय्गु योजना खः धकाः जनजाति, मधेसी नापं राज्यं बहिस्करणय् लाकातःगु समुदायया नेतातय्सं स्पष्ट रुपं थुइके धुंकूगु अवस्थाय् एमालेया उगु प्रस्तावयात जनजाति, मधेसीनिसें राज्यं बहिस्करणय् लाकातःगु समुदायपाखें स्वीकार यानाः विरोध याइगु स्वाभाविक हे खः ।