पार्टीया निर्णय प्रतिगामी : एमालेया जनजाति नेता

‘न्हूगु शक्तिया नितिं वार्ता पुचः’

येँ (झीगु स्वनिगः)

नेकपा (एमाले)या आदिवासी जनजाति नापं मधेसी नेतातय्सं पार्टीया राष्ट्रिय भेलां याःगु निर्णय प्रतिगामी पलाः खः धकाः ठहर याःगु दु । एमालें येँय् वंगु ४ गतेनिसें राष्ट्रिय कार्यकर्ता भेला यानाः राष्ट्रिय सहमतिया सरकार दयेकेगु, अले संघीय आयोग दयेकाः संविधान जारी यायेगु नापं संसदया चुनाव यायेगु धकाः निर्णय याःगु प्रतिगामी पलाः खः धकाः उगु पार्टीया आदिवासी जनजाति नापं मधेसी नेतातय्गु निन्हुयंकं जूगु भेलां ठहर याःगु खँ केन्द्रीय नेता राजेन्द्र श्रेष्ठं कनादीगु दु ।

निन्हु यंकं धौख्यलय् जूगु एमालेया जनजाति नापं मधेसी नेतातय्गु भेलां आः संघीयताया सालय् एकल जातीय पहिचानया आधारय् राज्य पुनर्संरचना यायेगु सहमति यानाः संविधानसभायात पुनस्र्र्थापना यानाः न्हूगु संविधान जारी यायेमाः धकाः तकं माग याःगु दु । यदि आदिवासी जनजाति मधेसी नापं राज्यं बहिस्करणय् लाकातःपिं समुयायया थुगु मगायात सम्वोनध यायेगु ज्या मयात धाःसा न्हूगु शक्ति निर्माण यायेगु लँपुइ वनेगु जुइ धकाः नं इमिसं धाःगु दु । निन्हु यंकं गोप्य कथं जूगु उगु भेलाय् एमालेया न्वाकु अशोक राई, पोलिटब्यूरो दुजः रामचन्द्र झा, पृथ्वीसुब्बा गुरुङ, केन्द्रीय दुजःपिं राजेन्द्र श्रेष्ठ, रकम चेम्जोङ, शत्रुधन महतो, किरण गुरुङ, दलबहादुर रानामगर, रिजवान अन्सारी, हेमराज राई, गोपाल ठाकुर, विजय सुब्ब अथे हे पुलांम्ह सभासद् पासाङ शेर्पा नापं २२ म्ह आदिवासी जनजाति नापं मधेसी नेतातय्सं ब्वति कयादीगु खः ।

थ्व हे दथुइ नेपाःया विशेषतायात चित्रण जुइगु कथं आदिवासी , जनजाति, मधेसी, दलितनिसें खय् ब्रम्हुतक तकं प्रतिनिधित्व याकेगु कथं न्हूगु राजनीतिक शक्ति निर्माण यायेगु नितिं आदिवासी जनजाति, मधेसी नापं राज्यं बहिस्करणय् लकातःगु समुदयया नेतात, उगु समुदायया प्रतिनिधित्व यानाच्वंपिं थीथी दलया नेतातलिसे वार्ता यायेत उगु भेलां न्याम्हेसिया बार्ता पुचः तकं नीस्वंगु दु ।

वार्ता पुचःया कजिइ एमालेया न्वकु अशोक राई च्वनादीगु दुसा अथे हे दुजलय् रामचन्द्र झा, पृथ्वी सुब्बा गुरुङ, राजेन्द्र श्रेष्ठ व रकम चेम्जोङ दुजः कथं च्वनादीगु दु । उगु वार्ता पुचलं आः थीथी दलय् दुने च्वंपिं आदिवासी जनजाति मधेसी नापं राज्यं बहिस्करणय् लाकातःपिं समुदयाया नेतात नापं एकल जातीय पहिचानया आधारय् राज्य पुनर्संरचना यायेमाः धैगु पक्षय् दुपिं मनूतलिसे आःया ई व देय्यात ल्वःगु कथं न्हूगु राजनीतिक शक्ति निर्माण यायेगु कथं न्हूगु हे दल दयेकाः वनेगु तयारी याःगु दु ।