पुलांगु येँ शहर विकासया नितिं जागरण अभियान

वंगु छुं दिं न्ह्‍य: येँया पुलांगु दुनेया शहर विकास निर्माणया ज्या न्ह्‍याकेगु नितिं नेवा: जागरण मञ्चया पहलय् पूर्व वडाध्यक्षपिनिगु छगू बृहत भेला यासें येँ महानगरपालिका विकास समूह नीस्वंगु दु । उगु विकाश समूहं तदर्थ समितिकथं नीस्वंगु ख:सा उगु समिति ३० वडाया पूर्व वडाध्यक्ष चिनियामान बज्राचार्यया संयोजकत्वय् २३ वडाया पूर्व वडाध्यक्ष पवित्र बबज्राचार्य, २१ वडाया पूर्व वडाध्यक्ष विद्यासुन्दर शाक्य, २६ वडाया पूर्ववडाध्यक्ष केदार चित्रकार, २७ वडाया पूर्ववडाध्यक्ष बाबुराजा बज्राचार्य, २५ वडाया पूर्ववडाध्यक्ष विकाशभक्त श्रेष्ठ, कान्तिपुर विकास समितिया नाय: रामकृष्ण महर्जन, असन सेवा समितिया यज्ञ तुलाधर च्वनादीगु दु । विकास समूहया ज्याखँ न्ह्‍याकेगु भाला नेवा: जागरण मञ्चया अध्यक्ष सुजीव बज्राचार्ययात ब्यूगु दु । समूहय् दुनेया शहरया सकल पूर्ववडाध्यक्ष, सक्रिय क्लव, संघसंस्था व समाजसेवीपिंत दुज:कथं तया यंकेगु निर्णय नं या:गु दु । येँया ऐतिहासिक पुलांगु दुनेया शहर न्हियान्हिथं जिर्ण जुजुं वनाच्वंगु, विकास निर्माणया ज्या थप्प जुयाच्वंगु व भित्री शहरया फुक्क हे लँ स्यनाच्वंगु लिसें फोहरमैलाया व्यवस्थापन ध्वगिक स्यनाच्वंगु, अव्यवस्थित बजा: जुजुं वनाच्वंगु वा:चायेका: भित्री शहरया विकासया नितिं जागरण अभियानया लिसेलिसें सम्बन्धित निकायलय् मा:कथंया दवाव बीगु नितिं उगु समूह स्वंगु खँ जागरण मञ्चया अध्यक्ष सुजीव बज्राचार्यं जानकारी बियादीगु दु ।
वय्‍कलं दुनेया शहरया परिभाषा न्हूकथं जूगु जानकारी बिसें क्व:नेया टेकुतक, थ:नेया पकना:ज्व: सोर्‍हखुट्टेतक, पश्चिमय् डल्लु ताँतक व पूर्वय् भोटाहितितक व भित्री शहरया मूलँनाप स्वा:गु थाय्‍यात आ:या नितिं दुनेया शहरकथं नालाकयातयागु खँ कनादीगु दु । उगु समूह नं येँ महानगरपालिकाया कार्यकारीणि अधिकृतया थाय् डेलिगेशन वना: भित्री शहर दुने तत्काल रुपं एकसूत्रीय माग कथं लँ दयेकेमा:गु ज्ञापन पौ ल:ल्हा:गु दु । अथेहे २०६८/६९ या बजेटय् भित्री शहरया नितिं तयात:गु बजेट रकमान्तरण यायेमज्यूगु व वइगु आर्थिक वर्ष ०६९/७० भित्री शहर निर्माणया नितिं बजेट विनियोजन यायेमा:गु माग नं या:गु दु । थुकथंया माग पूरा मयात धा:सा आवश्यक कथंया संघर्ष यायेगु ख्याच्व: नं ब्यूगु दु । विकास समूहया मुँज्यां भित्री शहरया लँ दयेकेगु ज्याखँयात स्वयेगु नितिं समूहया दुज: बाबुराजा महर्जन व केदार चित्रकारयात भाला ब्यूगु दु । अथेहे भित्री शहरया १५, १६, १७, १८, १९,२०, २१, २२, २३, २४, २५, २६, २७, २८, २९ व ३० वडाया पूर्ववडाध्यक्ष व समाजसेवीपिनिगु बृहत भेला याना: विकास निर्माणया सम्बन्धय् सहलह यायेगु नितिं समूहया संयोजक चिनियामान बज्राचार्य, विद्यासुन्दर शाक्य, चन्द्रानन्द नेवा:या संयोजकत्वय् भेला समिति नीस्वंगु दुसा याकनं हे उगु भेला स:तेगु तयारी जुयाच्वंगु दु । अथेहे येँ महानगरपालिकापाखें प्रस्तावित असनं निसें वंघलय् तक ल्वहतं सीगु ज्या तत्काल यायेमा:गु माग यासें असं, बालकुमारी, जनबहा:या स्थानीयबासी व जनप्रतिनिधित महानगरपालिकाय् डेलिगेशन वनेगु निर्णय या:गु दु ।

More Stories Like this