पेन्टिङ्ग
अनिक शाक्य
झीगु देय् नेपाः शीर्षकया
पेन्टिङ्ग कम्पिटिशन,
जि नं ब्वति कयाः उकिइ,
तर छु च्वयेगु
जिगु दिमागय् मलूनी,
कम्पिटिशन शुरु जुल
फुक्कसिनं तुयुगु कार्ड बोर्डय्
पेन्सिलं कियाः,
ब्रसं रंगः इलाः
पेन्टिङ्ग यानाहल,
तर...
तर, जिगु दिमागय्
आतकं मलूनी कि -
जिं छु च्वये ... ?
आपा बिचाः यानालिं,
जिगु ल्हातय् च्वंगु
ब्रस संका हे छ्वयाः,
अले बुलुहुँ
पेन्टिङ्ग यानाः यंकाः
जिं च्वयाः
नेपाः देय्या ध्वाँय्
तर कुं गयाच्वंगु,
भ्वाथःगु,
हाज्याहाज्या गुनाच्वंगु,
स्वये हे छम्ह
बलात्कृत मिसाया लं थें...,
व हे ध्वाँय् ज्वंकाः
फ्वगिं मचा छम्ह च्वयाः,
व मचाया अवस्था नं अथे हे -
नये मखंम्ह लाछि-खिचा थें,
तःजाःछेँया कःसिं
फोहोर प्वचिना वांछ्वयातःगु थें,
वयागु क्यातुगु तुतिइ लाकां मदु,
मचा जूसां ख्वालय्
मचा पहःया हिसि मदु,
दुसा अभाव दु,
भोखमरि दु,
ल्वय् दु,
अले भ्वाथःगु लं छजु नं......
अनलिं जिं च्वयाः....,
छगू फोहोरया डंगुर द्वचिनाच्वंगु -
व हे मचाया लिक्कसं,
व थासय् धनि गरिब फुक्कसितं
समान अधिकार दु
फोहोर वांछ्वयेगु,
फोहोरया डंगुर लिक्कसं
छगू साइनबोर्ड तयाः
अले च्वयाः,
"यहाँ फोहोर फाल्न मनाही छ ।"
अन न्ह्यःने सुं
निखाः स्वखाः
ततःखागु बिल्डिङ्ग च्वयाः
स्वये हे ल्ववनापुसे च्वंगु,
अन छगू तःब्याःगु लँ नं च्वयाः,
तर मस्यू,
जिं च्वये मसगुलिं खः ला
लँ धाःसा छति हे बांलाः मजू,
थथ्या क्वथ्या,
गाः गाः,
ध्याचः ध्याचः,
व लँपुं खने दयेका तापाक्क
स्वयम्भू भगवान्या
छत्वाःचा लु च्वयाः
तर व नं अय्र पोलुषनं
बांलाक खने मदु,
बुलुसे च्वं ...
अन लिपा जि पलख दिनाः
अले थुंदिक स्वयाच्वना
थःगु पेन्टिङ्ग,
व पेन्टिङ्ग ला कुरुप जुयाच्वन
सुसाःकुसाः मदुगु
भ्वाथःगु छेँ थें,
वासः दयाः नं कुष्ठ रोगं
कयेका च्वंगु ल्वगि सलिल थें,
थुलि अप्वः नेपाः देय्या दुर्गति
चित्रण याये मफुत जिं,
उकिं
मयल दः स्वये
कुरुप जुयाच्वंगु थःगु हे देय्
मयल दः पूवंके
थ्व पेन्टिङ्ग नं !
Related Stories
बाखं च्वये मखुनी अय् जि यःम्ह नेपालभाषा साहित्य ख्यः जि कवि मखु मतिना जकं जूगु खः ला !! बुनाः मतिना जि थः हेMore Stories Like this
मांया ख्वाः स्वये नेवाः हाइकु निलापौ नेवाः हाइकु निलापौ नेवाः हाइकु निलापौ नेवाः हाइकु निलापौ
