बहुदलीय मर्मया अःखः माधव नेपालया सरकार

सुरेश

जंगलय् च्वनाः जनयुद्ध न्ह्याकाच्वंपिं माओवादीत युद्ध त्वःताः मूलधारया राजनीतिइ वइगु जुल धायेवं नेपाली कांगे्रस व नेकपा एमाले थेंज्याःपिं बहुदलीय व्यवस्थाया तत्कालिन ठेकेदारतय्सं माओवादीया नेतातय्त करिब करिब गंगाजलय् पतिंचा डुबे याकेगु शैलीं हे पाः फयेकूगु खः बहुदलीय व्यवस्था माने याये संसदीय व्यवस्था माने याये ।

खतुं माओवादीं संसद माने याःसां संसदीय व्यवस्थायात माने याःगु मदुनि । अथे खःसां बहु- दलीय व्यवस्था धाःसा माने याये मखु धकाः गनं धाःगु मदुनि ।

माओवादीं ला कांग्रेस व एमालेया खँ न्यनाः बहुदलीय व्यवस्थायात गथे खः अथे हे पालना यानाच्वंगु दनि । तर अबलय् माओवादीयात पाः फयेकूपिं वहे बहुदलीय ठेकेदारतय्सं धाःसा थौं बहुदलीय व्यवस्थायात बजाः दथुइ तयाः चीरहरण याना बिउगु दु । थःगु सरकार चले यायेगु लागिं 'प्रधानमन्त्री' माधव नेपालं थौं गुगु जंगली शैलीं ज्या यानाच्वंगु खः उकिं नेपाःया बहुदलीय व्यवस्थाया घोर अपमान जुयाच्वंगु दु । यदि थ्वहे शैली ज्वनाः माधव नेपालया सरकार चले जुल व टिके नं जुल धाःसा उकिया उपलब्धी कथं देय्या बहुदलीय व्यवस्था पूर्ण रुपं धरासायी जुइ ।

गुगुं नं पार्टीपाखें मन्त्री कायेगु खःसा उगु पार्टीपाखें पौ हे च्वयाः प्रधानमन्त्रीयात बीमाः । अथे पौ सहित वःम्ह मन्त्री जक आधिकारिक मन्त्री जुइ । तर माधव नेपालं विजय गच्छदारयात पार्टीं छ्वयाहःगु पौ मदुसां नं उपप्रधानमन्त्री दयेका बिल । उकिया लिच्वः कथं फोरम निकू कुचा जुल । माधव नेपाल थेंज्याःम्ह बहुदलीय व्यवस्थाया गुथियार हे धाःसां जिउम्ह नेतां व्यवस्थाया मर्म विपरित मेगु पार्टीया मनूतय्त मन्त्री दयेके जिउ ला थुकिं ला व्यवस्थायात कमजोर जक याइ ।

वय्कःया कारणं फोरम कुचा जुल । फोरम कुचा जुयाः सुयात फाइदा दइ फाइदा कांग्रेसयात जुइ । छाय्धाःसां कांग्रेसया दकलय् बल्लाःगु भोट बैंक धइगु तराई खः । थुगुसी फोरमया कारणं कांग्रेसया उगु भोट बैंक बांमलाक स्यन । फोरम कुचा जुयाः कमजोर जुल धाःसा उकिं फाइदा काइम्ह कांग्रेस खः । तराईलय् एमालेया पकड मदु । उकिं वं छुं लबः काये फइ मखु । अय् जुयाः फोरम टुक्रा जूसा थजु धकाः हे जकं कांग्रेसं माधव नेपालयात दुगुचा दयेकाः थ्व 'गेम' म्हिताच्वंगु खः ला यदि फोरम कुचा जुल धाःसा अन च्वंम्ह विजय गच्छदार थेंज्याःम्ह सशक्त नेता हानं कांग्रेसय् लिहां वयेफु । थुकिं कांग्रेसयात अझ बल्लाकी । अले नेपाःया राजनीतिइ कांग्रेस बल्लाइगु धइगु एमाले कमजोर जुइगु खः । राजनीतिया समीकरण ला एमाले नेतातय्सं थूगु हे जुइमाः ।

उकथं हे माधव नेपालया सरकारय् वनेगु निंतिं नेपाली कांग्रेसं गुकथं मन्त्रीत ल्यल व नं न बहुदलीय व्यवस्थाया मर्म कथं जू न प्रधानमन्त्री माधव नेपालया लागिं पाय्छि जू । नेकां सभापति गिरिजाप्रसाद कोइरालां पार्टी दुने सल्लाह तकं मयासे छगू कथं तानाशाही चले यानाः थः म्ह्याय् सुजाता कोइरालायात मन्त्री दयेकि धकाः सरकारय् छ्वया हल । सुजातायात कांग्रेसी मन्त्रीतय् नेता दयेकेसातकि वयां च्वय्यापिं सुं नं नेतात सरकारय् मन्त्री जूवने मछिन । थ्व नं गनं कोइरालां चायेक चायेकं हे याःगु ज्या जकं मखु ला माधव नेपाल थेंज्याःम्ह चुनावय् बूम्ह मनूया मन्त्रिमण्डलय् छाय् कांग्रेसया वरिष्ठ नेतात छ्वयेगु धकाः नियतवश हे जकं सुजातायात छ्वयाहःगु खः ला यदि अथे हे खःसा थ्व ला कोइरालापाखें माधव नेपालयात याःगु तःधंगु हे कुटनीतिक अपमान खः ।

थ्व ल्याखं स्वयेबलय् भाजु माधव नेपाल थौं गुगु गन्जागोल दथुइ देय्या प्रधानमन्त्री जुयादीगु दु थ्व वय्कलं हे संघर्ष यानाः हःगु व्यवस्थाया घोर अपमान व उकियात हे विघटन यायेगुपाखे ल्ह्वंगु छगू तःधंगु पलाः खः धायेत लिफः स्वये माली मखु ।

More Stories Like this