पार्टी दुने बहस यायेमाः नेतृत्व जनजाति नेतातय्गु ब्यागलं कथं मुँज्या

येँ (झीगु स्वनिगः)

नेकपा (एमाले)या नेतातय्सं जनजाति व मधेसी नेतातय्त पार्टी दुने हे थःगु खँ तयेत आह्वान याःगु दु । म्हिगः बुधवाः एमालेया स्थायी समितिया मुँज्या च्वनाः अथे जनजाति नेतातय्त आह्वान याःगु खः । एमाले पार्टी लोकतान्त्रिक पार्टी खः धकाः न्ह्यथसें थःपिनिगु मत पार्टी दुने हे तयेमाः धकाः न्ह्यथसें पार्टीया ज्याय् हे लिहां वयाः थःपिनिगु विचाः तयेत इनाप याःगु दु ।
मुँज्या लिपा पिथंगु विज्ञप्तिइ पार्टी लोकतान्त्रिक दृष्टिं उन्नतस्तरया अभ्यासय् वनाच्वंगु पार्टी दुने फरक बिचाः तल धकाः छुं नं कथंया मजिउगु व्यवहार यायेगु जुइमखु धकाः नं न्ह्यथनातःगु दु ।

राज्य पुनर्संरचनाया सवालय् नेतृत्वं ज्वनाच्वंगु लाइन हे पार्टीया लाइन खः धकाः अप्रत्यक्ष रुपं दावी यानाः जनजाति व मधेसी नेतातय्गु विचाःयात फरक मत धकाः न्ह्यथंगु दु । तर आदिवासी जनजाति व मधेसी नेतातय्सं धाःसा पार्टीया तःमुँज्यां हे जातीय पहिचानया आधारय् राज्य पुनर्संरचना यायेगु अले राज्यया फुक्क निकाय दुने समानुपातिक समावेशी प्रतिनिधित्व यायेगु धकाः क्वःछिनातःगुलिं बास्तविक लाइन थःपिन्सं हे ज्वनाः वयाच्वनागु खः अले नेतृत्वं धाःसा पार्टीया लाइन अःखः ज्वनाः वनाच्वंगु खः धकाः न्ह्यथनाः वयाच्वंगु दु ।
यदि थःपिन्सं धयाच्वनागु एजेण्डायात सम्वोधन मयात धाःसा उगु पार्टीइ च्वना च्वनेगुया अर्थ मदु धकाः धयाः वयाच्वंगु दु । थ्व हे झ्वलय् म्हिगः बुधवाः हे एमालेया आदिवासी जनजाति नापं मधेसी नेता व कार्यकर्तातय्गु भेला याःगु दु । उगु भेलाय् पार्टीया नेतृत्वयात मंगलवाः जक लःल्हानागु गुंगू बुँदाया मागयात कयाः जानकारी बिइगु खँ कनादीगु खः । एमालेया नेतृत्वं पार्टीया लाईनयात बेक्वयेकाः आदिवासी जनजाति नापं राज्यं बहिस्करणय् लाकातःगु समुदाययात झंगः लायेगु ज्या यानाच्वंगु दु धकाः जनजाति नेतातय्सं धयाः वयाच्वंगु दु ।

आः एमालेया आदिवासी जनजाति नापं मधेसी नेता व कार्यकर्तात संस्थापन पक्षं याइगु असार ४ गतेनिसेंया राष्ट्रिय कार्यकर्ता भेला बहिस्कार याइगु जूगु दु । पार्टीया तःमुँज्याया म्याण्डेट यात फातापुइकाः जनतायात झंगः लायेत नापं जनजाति व मधेसी नेतात विरुद्ध वनेत अथे अनावश्यक कथं कार्यकर्ता भेला यायेत्यंगु खः धकाः एमालेया छम्ह जनजाति नेतां दावी यानादीगु दु ।