हस्तक्षेपकारी भूमिका म्हितकेगु कुतः
कांग्रेस व एमालेपाखें राष्ट्रपतियात इनाप
येँ (झीगु स्वनिगः)
नेपाली कांग्रेस व एमालेया शीर्ष नेतातय्सं आः वयाः राष्ट्रपतियात सक्रिय यायेगु कुतः यानाहःगु दु । लिपांगु इलय् वयाः राजनीतिक अन्यौलता ब्वलनाच्वंगु अवस्थाय् राष्ट्रपतियात हस्तक्षेपकारी भूमिका म्हितके फत धाःसा थःपिनिगु स्वार्थ पूवनी धकाः तायेकाः अथे खेल सुरु यानाहःगु खयेमाः धकाः मनूतय्सं अनुमान यानाहःगु दु ।
थ्व हे दथुइ वर्तमान सरकारयात चीकेगु नितिं राष्ट्रपतियात इनाप यानादीगु दु । म्हिगः सोमवाः कांग्रेस व एमालेया नेतात राष्ट्रपतियाथाय् वनाः उगु कथं इनाप यानादीगु खः धकाः सूत्रं धाःगु दु ।
अन राष्ट्रपति डा. रामवरण यादवयात नापालानाः लिहां वये धुंकाः एमाले व कांग्रेसया नेतातय्सं धाःसा कामचलाउ सरकारं सिफारिस याःगु अध्यादेशयात जारी मयायेत इनाप यानागु खः धकाः धयादीगु दु । प्रधानमन्त्री डा. बाबुराम भट्टराई नं म्हीग आइतवाः जक राष्ट्रपति यादवयात नापलानाः वर्तमान राजनीतिक अवस्थाया जानकारी बिइगु नापं अध्यादेश जारी यायेगु विषयसं सहलह ब्याकादीगु खः ।
कांग्रेस व एमालेया नेतातय्सं संविधान कथं पदमुक्त जुइ धुंकूगु अवस्थाय् वर्तमान प्रधानमन्त्री भट्टराईपाखें्र संवैधानिक व्यवस्थाया अःखः स्वेच्छाचारीया रुपय् थीथी विधेयकत अध्यादेशपाखें हयेगु तयारी यानाच्वंगुलिं थःपिन्सं उकियात कयाः कडा आपत्ति प्वंकागु खः धकाः धयादीगु दु ।
राष्ट्रपतियात नापलाये धुंकाः कांग्रेसया नेता रामचन्द्र पौडेलं धयादिल ‘संविधानसम्मत व राजनीतिक सहमतिया आथारय् निर्णय यायेगु जुइ धकाः राष्ट्रपति यादवं जानकारी बियादीगु दु ।’ अथे हे एमालेया नेता माधवकुमार नेपालं नं संचारकःमितलिसे खँल्हासें धयादिल ‘पदमुक्त जुयाः कामचलाउ जुइ धुंकूम्ह प्रधानमन्त्रीयात संविधानया धारा ४३ या सरकार संचालनसम्वन्धी व्यवस्थाय् अध्यादेश सिफारिस यायेगु अधिकार मदु ।
जनआन्दोलनया भावना, राजनीतिक सहमति व सहकार्यया सस्कृति कथं अध्यादेशया सिफारिस यायेगु अधिकार आःया प्रधानमन्त्रीयाके मदु ।’ राष्ट्रपतियात नापलायेत कांग्रेसया सभापति सुशील कोइराला, कांग्रेसया नेता रामचन्द्र पौडेल, एमालेया नायः झलनाथ खनाल व माधव कुमार नेपाल वनादीगु खः ।
