हाकनं अदालतयात स्वयाच्वन

‘संविधानसभाया पुनस्र्थापनायात विषययात कयाः नेतातय्सं अदालतया निर्णय पियाच्वन’

येँ (झीगु स्वनिगः)

प्रमुख दलया शीर्ष नेतातय्सं मूल रुपं यायेमाःगु ज्या राज्य पुनर्संरचनाया सवालयात कयाः न्हापा मयासे लिपा यायेगु धकाः ततं वनाच्वंगु अले अन्तिम इलय् वयाः सर्वोच्च अदालतया फैसलायात कार्यन्वयन यायेमाःगु अवस्था वयाः हे वंगु जेठ १४ गते चान्हय्् १२ बजे अन्ततः संविधानसभा भंग जूगु खः । जननिर्वाचित छगू जक संस्था संविधानसभा भंग जुइवं देशय् छगू कथं राजनीतिक अन्यौलता ब्वलना वःगु दु ।

उकिं यानाः प्रमुख दलत दथुइ कचमच झन झन तच्वया वःगु दु । छगू दलं मेगु दलयात सिंविधानसभा भंग याःगु द्वपं तकं बियाः वयाच्वंगु दु । अथे थःथःगु कथंया शक्ति प्रदर्शन यायेगु नापं मोर्चाबन्दी यायेगु ज्या नं तिब्र रुपं जुयाच्वंगु दु ।
सर्वोच्च अदालतया आदेशं यानाः संविधानसभाया म्याद थप याये मफया संविधान सभा भंग जूगु अवस्थाय् आः वयाः हाकनं प्रमुख दलया शीर्ष नेतातय्सं हाकनं अदालतया हे आदेश पिइगु ज्या यानाच्वंगु दु ।

सर्वोच्च अदालतय् संविधानसभा पुनस्र्थापनाया विषययात कयाः मुद्धा जुयाच्वंगु अवस्थाय् अदालतं छु फैसला याइगु खः धकाः पियाः जक दलया नेतातय्सं थःथःगु कथं निर्णय यानाः वनेगु लँपु स्वयाच्वंगु दु धकाः राजीतिक विश्लेषकतय्सं टिप्पणी यानाहःगु दु ।
सर्वोच्च अदालतं संविधानसभा पुनस्र्थापना यायेफै धकाः फैसला जुल धाःसा प्रमुख दलत संविधानसभाया पुनस्र्थापनापाखे वनीगु अले अदालतं पुनस्र्थापनाया विपक्षय् फैसला यात धाःसा चुनाव बाय् मेगु माध्यम मालाः वनेगु नितिं प्रमखु दलया नेतातय्सं तयारी यानाच्वंगु दु धकाः टिप्पणी यानाहःगु दु ।

विशेष यानाः संवैधानिक विषययात कयाः अदालतं फैसला यायेगु अले संविधानसभा तकं भंग जुइ धुकूगु अवस्था ब्वलंगुलिं आः वयाः यक्व हे राजनीतिक नेतातय्सं संवैधानिक अदालतया आवश्यकतायात महसूस यानाहःगु दु ।

संविधानया ब्याख्या यायेगु भाला हे अदालतयात बियातःगुलिं अथे राजनीतिक अन्यौलता ब्वलना वःगु खः धयादिसें छम्ह कानुनविद्ं आः संवैधानिक अदालतया अपरिहार्य जूगु पुष्टि जुल धकाः तकं दावी यानादीगु दु ।

उकिं थ्व इलय् नेतातय्सं थःथःगु दल दुने संविधानसभा पुनस्र्थापनाया सवालयात कयाः बहस न्ह्याकूगु दु । दलय् दुने नेतातय्गु ब्यागलं ब्यागलं कथं बिचाः तकं वयाच्वंगु दु ।
राष्ट्रिय राजनीतिक सहमति ब्वलंकेफैगु अवस्था मदयाः उगु विषययात कयाः नेतातय्सं बहस यायेगु जक यानाच्वंगु दुसा खास हे निर्णय यानाच्वंगु अवस्था मदु । छगू कथं थ्व इलय् दलया नेतातय्सं सर्वोच्च अदालतया फैसलायात पियाच्वंगु धाःसां छुं पाइमखु धकाः मनूतय्सं टिप्पणी यानाहःगु दु ।

उकिं हे गुलिं दलतय्सं आन्तारिक सहलह ब्याकाच्वंगु दुसा गुलिसिनं धाःसा राष्ट्रिय भेलांनिसें सतकय् शक्ति प्रदर्शन यायेगु ज्या तकं यानाच्वंगु दु । अले फयां फत्तले थःथःपिनिगु मोर्चाबन्दीइ अप्वः दलत दुथ्याकेगु स्वयाच्वंगु दु । थ्व राजनीतिक अन्यौलताया नमूना खः धकाः धयाहःगु दु ।