बैद्य विचार समूह सहभागी मजुइगु
येँ (झीगु स्वनिगः)
थौं शुक्रवाः कांग्रेस—एमाले नापं पुलांपिं जुजुवादी दलत तकं दुथ्याकाः छगू दर्जन दलया मंकाःगु गठबन्धनं खुल्लामञ्चय् यायेत्यंगु सभाय् एकीकृत नेकपा (माओवादी)या बैद्य पक्ष नं सहभागी जुइ धकाः गुगु कथं प्रचार यानाच्वंगु दु व षडयन्त्र खः धकाः धाःगु दु ।
एकीकृत माओवादीया बैद्य विचार समूहया छम्ह नेतां झीगु स्वनिगः न्हिपौलिसे खँल्हासें थौंया कांग्रेस एमालेया सभाय् वनी धकाः गुगु कथं खँ हयाच्वंगु खः व धैगु क्रान्तिकारी विचार समूहयात कमजोर यायेगु षडयन्त्र खः धकाः धयादीगु दु । थ्व इलय् राष्ट्रिय गोलमेच सभा यानाः राजनीतिक निकास बियाः न्ह्यःने वनेमाः धकाः बैद्य विचार समूहपाखें थःपिनिगु मत तयाः वयाच्वंगु दु ।
पहिचानया आधारय् राज्य पुनर्संरचना यायेमाःगु, जनताया संविधान तयार यायेगु पक्षय् न्हूगु संविधान दयेकेगु नितिं आःया अवस्थाय् फुक्क राजनीतिक दलयात दुथ्याकाः गोलमेच भेला यानाः राष्ट्रिय सरकार निर्माण यानाः वनेमाः धकाः बैद्य पक्षं धयाः वयाच्वंगु खः ।
