राष्ट्रिय भेलायात लिच्वः लाकेगु कुतः

प्रचण्ड — बाबुराम पक्षं पंगः थन

येँ (झीगु स्वनिगः)

एकीकृत नेकपा (माओवादी) दुने लाईन संघर्ष तच्वयाः वनाच्वंगु अवस्था क्रान्तिकारी समूह कथं नालातःगु बरिष्ठ उपाध्यक्ष मोहन बैद्य किरण समूहयात पंगः थनेत विशेष यानाः माओवादीया नायः पुष्पकमल दाहाल प्रचण्ड पक्ष व न्वकु नापं प्रधानमन्त्री डा. बाबुराम भट्टराई पक्षं न्हूगु कथंया खेल सुरु यानाहःगु दु ।

एकीकृत नेकपा (माओवादी)या बरिष्ठ न्वकु मोहन बैद्य किरण पक्षधरया वइगु असार २ गतेनिसें ४ गते तक येँय् जुइगु राष्ट्रिय कार्यकर्ता भेलायात पंगः थनेगु नितिं पार्टीया नायः पुष्पकमल दाहाल प्रचण्ड व न्वकु नापं प्रधानमन्त्री डा. बाबुराम भट्टराई विचार समूहपाखें न्हूगु कथंया खेल सुरु याःगु दु ।

माओवादीया बैद्य पक्षधरं राष्ट्रिय सम्मेलन यात धाःसा उकिं पार्टीयात तःधंगु लिच्वः लाइगु नापं पार्टीइ बैद्य पक्ष अझ सशक्त जुयाः वनीगु संभावना अप्वयाः वःगु ठहर यानाः अथे प्रचण्ड—बाबुराम पक्षं खेल म्हितेगु सुरु यानाहःगु खः धकाः धाःगु दु ।
क्रान्तिकारी पक्षया नेतृत्व यानाच्वंगु बैद्य पक्षया राष्ट्रिय भेलायात लिच्वः लाकेगु कथं थाय् थासय् माओवादीया प्रचण्ड—बाबुराम पक्षं तयारी याःगु दु ।
थ्व हे झ्वलय् बैद्य विचार समूहपाखें सःतूगु उगु भेलायात लिच्वः लाकेगु अले कार्यकर्तातय्त छ्वयाः महयेगु षडयन्त्र कथं कोचिला राज्यं सुरु यायेत्यंगु खः धकाः सूत्रं धाःगु दु ।
थ्व हे झ्वलय् बैद्य विचार समूहया पकड दुगु राज्य समितित मध्ये छगू कथं नालातःगु कोचिला राज्य समितिइ प्रचण्ड—बाबुराम पक्षं पंगः थनेत असार १ गते प्रशिक्षणया ज्याझ्वः तःगु दु । येँय् बैद्यपक्षं सःतूगु राष्ट्रिय भेला २ गतेनिसें जुयाः उगु राष्ट्रिय भेलाय् वये मफयेकेगु कथं १ गते हे प्रशिक्षण ज्याझ्वः प्रचण्ड बाबुराम पक्षं तःगु खः ।
प्रचण्ड व बाबुरामया तप्यंक हे निर्देशनय् उगु कथं कोचिला राज्यय् अथे प्रशिक्षण ज्याझ्वः तःगु खः धकाः सूत्रं धाःगु दु । उगु प्रशिक्षण ज्याझ्वःयात विशेष ज्याझवः कथं धाःगु दु । उगु ज्याझ्वलय् क्वय्या तहयापिं कार्यकर्तातय्त तकं उपस्थिति याकी धकाः धाःगु दु ।

आः तकया दुने सुनसरीया द्वःछिम्ह कार्यकर्तायात प्रशिक्षण बिइगु तयारी याःगु दु । झापा व मोरङय् गुलिसित प्रशिक्षण बिइगु धकाः नं सहलह जुयाच्वंगु दु धकाः धाःगु दु ।
सूत्रं धाः कथं झापाय् पार्टीया नायः पुष्पकमल दाहाल प्रचण्डं प्रशिक्षण बियादी । अथे हे कोचिला राज्य समितिया इन्चार्ज हरिबोल गजुरेल, मोरङय् केन्द्रीय दुजः प्रल्हाद बुढाथोकी व शक्ति बस्नेत अथे हे सुनसरीइ प्रधानमन्त्री डा. बाबुराम भट्टराईया स्वकीय सचिव गंगा श्रेष्ठं प्रशिक्षण बिइ धकाः धाःगु दु ।

अन पार्टी कमिटीं जनवर्गीय संगठनया प्रमुखनिसें जातीय संगठनया गां कमिटीया प्रमुखतय्त तकं अनिवार्य रुपं उपस्थिति जुइत सर्कुलर जारी याये धुंकूगु दु ।
अथे हे बैद्य विचार समूहया ज्याझ्वःयात लिच्वः लाकीगु कथं मेमेगु थासय् नं असार २ गतेनिसें ४ गते तक हे प्रचण्ड—बाबुराम पक्षं थीथी कथंया ज्याझ्वः तइगु संभावना अप्वयाः वःगु दु धकाः माओवादीया छम्ह नेतां जानकारी बियादीगु दु । उकिया नितिं नेतातय्सं गृहकार्य यानाच्वंगु दु धकाः नं सूत्रं धाःगु दु । अथे प्रचण्ड बाबुराम पक्षया पंगःया बाबजुत नं बैद्य विचार समूहपाखें धाःसा वइगु असार २ गतेनिसें ४ गते तक माओवादीया राष्ट्रिय भेला यानाः वर्तमान राजनीतिक अवस्था, पार्टी दुने नेतृत्वं याःगु गलत ज्या, आः पार्टी न्ह्याकेगु नितिं दयेकेमाःगु रणनीतिया विषययात कयाः ब्यापक रुपं सहलह ब्याकेत माःगु तयारी यानाच्वंगु दु धकाः माओवादीया छम्ह नेतां जानकारी बियादीगु दु ।