आः नेवाःतय्गु तयारी छु ?
येँ (झीगु स्वनिगः)
संविधानसभा विघटन जुइ धुंकूगु अवस्थाय् नेवाः स्वायत्त राज्य मंकाः संघर्ष समितिं आः छु याइगु खः धकाः नेवाःतय्सं न्ह्यसः तयाच्वंगु दु । संविधानसभा विघटन लिपा मंकाः संघर्ष समितिं जेठ १८ गते हाकुगु न्हि हनेगु ज्या याःगु खःसा अनं लिपा खास हे ज्याझ्वः हयाः मच्वंगुलिं अथे नेवाः स्वायत्त राज्य पक्षधर नेवाःतय्सं न्ह्यसः तयाहःगु खः ।
थ्व हे झ्वलय् नेवाः स्वायत्त राज्य मंकाः संघर्ष समितिइ दुथ्याःगु थीथी घटकत मध्ये छगू घटकया नेतां झीगु स्वनिगःलिसे खँल्हासें आः याकनं हे नेवाः नेतातय्गु दथुइ भावी रणनीतियात कयाः व्यापक सहलह ब्याकेगु कथं छुं दिं निरन्तर रुपं सहलह मुँज्या यायेगु तयारी जुयाच्वंगु दु धकाः जानकारी बियादीगु दु । अथे हे नेवाः राज्य प्राप्तिया आन्दोलनयात अझ अप्वः प्रभावकारी यानाः यंकेगु नितिं नं माःगु कथं गृहकार्य जुयाच्वंगु दु धकाः वय्कलं दावी यानादीगु दु ।
