जनजातितय्सं कांग्रेस त्वःतीगु

कन्हय् संघीयता विरोधी खय् ब्रम्हुतय्गु जक सभा जुइगु

यल (झीगु स्वनिगः)

नेकपा (एमाले)या आदिवासी जनजाति नापं मधेसी नेता व कार्यकर्तातय्सं जनजाति व मधेसीया जातीय पहिचान सहितया राज्य पुसनर्संरचना यायेमाःगु माग सम्वोधन यात धाःसा उगु पार्टी त्वःताः वनेगु जुइ धकाः ख्याच्वः बियाच्वंगु इलय् आः वयाः नेपाली कांग्रेसया नं आदिवासी जनजाति नेतातय्सं अज्वःगु हे कथंया ख्याच्वः ब्यूगु दु ।
थःपिनिगु माग सम्वोधन मजुल धाःसा पार्टी त्वःतेगु जुइ धकाः नेपाली कांग्रेसया आदिवासी जनजाति नेता व कार्यकर्तातय्सं ख्याच्वः ब्यूगु दु । म्हिगः पार्टीया केन्द्रीय ज्याकु सानेपाय् पार्टीया सभापतियात ज्ञापन पौ लःल्हासें अथे ख्याच्वः बिइगु ज्या याःगु खः ।

ज्ञापन पतिइ नेपाली कांग्रेसया शीर्ष नेतातय्सं यानाः संविधानसभाया विघटन यायेगु ज्या नापं जातीय पहिचानया आधरय् राज्य पुनर्संरचना याये मफुगु खः धकाः खँ न्ह्यथसें जातीय पहिचानया आधारय् राज्य पुनर्संरचनाया विपक्षय् कांग्रेस दन धाःसा थःपिं उगु पार्टीं पिहां वनेगु जुइ धकाः न्ह्यथनातःगु दु ।

जातीय पहिचानया आधारय् राज्य पुनर्संरचना यायेमाःगु, स्वायत्ता, स्वशासन नापं आत्मनिर्णयया अधिकार दयेमाःगु, जनसंख्याया आधारय् राज्यया हरेक निकायलय् समानुपातिक प्रतिनिधित्वः जुइमाःगु, समानुपाति निर्वाचन प्रणाली लागू यायेमाःगु लगायतया ११ बुँदाया माग यानातःगु उगु ज्ञापन पतिइ कांग्रेसया भातृ संगठन नेपाल आदिवासी जनजाति संघया सभापति इन्द्रबहादुर गुरुङ, नेपाल लोकतान्त्रिक खलःया नायः नेमसिंह नकःमि, नेपाल तामाङ संघया सभापति कबेल बहादुर लामा, नेपाल लोकतान्त्रिक शेर्पा संघया सभापति लाख्पा थिङवे, नेपाल राष्ट्रिय मगर संघया गणेश थापा मगर लगायतया ८ गू जातीय संगठनया सभापतितय्सं ल्हाःचिं तयातःगु दु ।
अथे हे ज्ञापन पतिइ वइगु जेठ २६ गते अर्थात कन्हय् संघीयता विरोधी दल राष्ट्रिय जनमोर्चा नाप तकं जानाः गुगु कथं खुल्लामञ्चय् सभा यायेत्यंगु खः उकिइ थःपिं सहभागी मजुइगु धकाः तकं उल्लेख यानातःगु दु ।

पार्टीया सभापति कोइरालायात लःल्हाःगु उगु ११ बुँदे ज्ञापन पतिइ कांग्रेसया पुलांपिं सभासद्तनिसें पुलांपिं जिल्ला सभापति नापं मेमेपिन्सं तकं ल्हाःचिं तयातःगु दु । जातीय पहिचानया आधरय् राज्य पुनर्संरचना यायेमाःगु माग यानाः कांग्रेसया शीर्ष नेतातय्त उगु कथं दबाव बिइगु ज्या याःगु आः तकया दुने दक्ले तःधंगु खः धकाः आदिवासी जनजाति नेतातय्सं दावी यानादीगु दु ।

अथे ज्ञापन पौ लःल्हानाकासें कांग्रेसया सभापति सुशील कोइरालां सलंसःम्ह आदिवासी जनजातिया नेता व कार्यकर्ताया दथुइ जनजातिया पहिचानयात कांग्रेसं ल्वःमंके फैमखु धकाः धयादीगु खः । वय्कलं जनजातिया मागयात सम्वोधन यायेत थःम्हं भूमिका म्हितेगु जुइ धकाः नं बचं बियादीगु खः ।

लुमंकेबहःजू नेकपा (एमाले)या आदिवासी जनजाति व मधेसी नेतातय्सं नं कन्हय् २६ गते जुइगु सभायात बहिस्कारयायेगु धकाः घोषणा याये धुंकूगुलिं आः २६ गतेया सभा धैगु जनजाति, मधेसीत मदुगु खय् ब्रम्हुतय्गु जक जुइगु अवस्था ब्वलंगु दु । एमालेया नेता राजेन्द्र श्रेष्ठं कन्हय्या सभायात थःपिन्सं बहिस्कार यायेगु जुइ धकाः स्पष्ट रुपं धयादीगु दु । उकिं यानाः कांग्रेस व एमालेया शीर्ष नेतात कन्हय् सुक्रवाःया सभायात गुगु कथं ताः लाकेगु धकाः च्यूताः कयाहःगु दु ।