बुद्धिजीवीतपाखें सत्तापक्षयात आलोचना, सुझाव व ध्याचू

येँ (झीगु स्वनिगः)

सत्तापक्षया मोर्चां म्हिगः मंगलवाः याःगु अन्तक्र्रिया ज्याझ्वलय् बुद्धिजीवीतय्सं आलोचना यायेगु, सुझाव बिइगुनिसें तसकं ध्याचू नकल । सत्तारुढ दलया अप्वः यानाः नेतातय् मेगु फुक्क ज्याझ्वः त्वःताः याःगु उगु ज्याझ्वलय् खुल्लामञ्चय् जूगु आमसभाय् न्वंवाये थें यानाः एकीकृत माओवादीया नायः प्रचण्ड, डा. बाबुराम भट्टराई, संयुक्त मधेसी मोचाया कजि नापं उपप्रधानमन्त्री विजयकुमार गच्छेदारं न्वंवासे संविधानसभा भंग कांग्रेस व एमालें यानाः खः धकाः द्वपं बियादीगु खः । संविधानसभाया सवालय् प्रचण्डं पुनस्र्थापना यायेमाः धकाः धयादीगु खःसा मधेसी मोर्चाया गच्छेदारं धाःसा उकिया अःखः पुनस्र्थापना यायेमजिउ अले चुनावय् हे वनेमाः धकाः धयादीगु खः ।

अथे नेतातय्सं न्वंवाये धुंकाः सुझाव बिइगु झ्वलय् राजनीतिक विश्लेषक सीके लालं ध्याचू नकाः धयादिल ‘प्रचण्ड व प्रधानमन्त्रीयात आनन्द जूगु तर जनायात दुःख जूगु दु । जनआन्दोलन, प्रतिक्रान्ति व सर्वपक्षीय सहमतिपाखें जक संविधानसभा पुनस्र्थापना जुइगु जुयाः थ्व स्वंगू हे ज्या आःया अवस्थाय् संभव मदु ।’

मल्ल के सुन्दरं संविधान जारी याये मफुगुलिं क्षमा फ्वनेमाःगु इलय् नेतातय्सं थःथःपिनिगु बखान जक त्वःतेगु याःगु खँ न्ह्यथसें धयादिल ‘संविधान दयेके मफत धकाः प्रचण्ड व प्रधानमन्त्रीं क्षमा फ्वनीला धकाः जनतां आशा याःगु खः तर अथे मजुल । छिकपिन्सं क्षमा फ्वने हे माः । सहमतिया नितिं जिमिसं थ्व प्रस्ताव हयागु दु धकाः धाइला धकाः आशा दुगु खः तर व नं मजुल । ’ ख्यालः कलाकार जितु नेपालं ध्याचू नकाः धयादिल ‘आमसभा होटल दुने जूवनाच्वंगुलिं सकलसित बधाई दु । जिमिसं चलचित्र दयेकेगु इलय् हिरो, भिलेन व मेमेपिं कलाकार सु सु धकाः ल्ययेगु तर प्यदँया संविधानसभाया फिलिम स्वया तर हिरो, भिलेन, ख्याली कालाकर सु धकाः तकं सीके मफत ।’

अन्तक्र्रियाय् यक्व हे बुद्धिजीवीतय्सं नेतातय्त ध्याचू नकेगु ज्या याःगु खःसा ज्याझ्वःया दथुइ हे गच्छदार पिहां वंगु खः । अथे हे प्रचण्ड व बाबुरामं धाःसा थःपिन्त नकूगु ध्याचू, आलोचना व सुझावयात तसकं ध्यान तयाः दक्ले लिपा सुभाय् धकाः क्वचायेकूगु खः ।