‘मूल खँ राजीनामा मखु, क्रान्तिकारी कार्यदिशा आत्मसातया खँ खः’
‘प्रचण्डं धाःगु खँ आः तक छगू हे लागू जुयाच्वंगु मदु’
येँ (झीगु स्वनिगः)
एकीकृत नेकपा (माओवादी)या बरिष्ठ न्वकु मोहन बैद्य किरणं आःया अवस्थाय् पार्टीया नायः पुष्पकमल दाहाल प्रचण्डया राजीनामा मू खँ मखु, मू खँ धैगु क्रान्तिकारी कार्यदिशा खः धकाः धयादीगु दु । लिपांगु इलय् नेपाःया राजनीतिइ वयाच्वंगु हिउपाः नापं एकीकृत माओवादी दुनेया लाइन संघर्षयात कयाः म्हिगः सोमवाः झीगु स्वनिगः न्हिपौलिसे खँल्हासें एकीकृत माओवादीया बरिष्ठ न्वकु नापं क्रान्तिकारी विचार समूहया नेतृत्व यानाच्वनादीम्ह मोहन बैद्य किरणं अथे धयादीगु खः ।
माओवादीया क्रान्तिकारी समूहपाखें प्रचण्डया राजीनामायात मू खँ दयेकाः थः पार्टीया नायः जुइगु अले उकिया नितिं प्रचण्डं राजीनामा बिइगु जुल धकाः गुगु कथं संचार माध्यमय् खँ वयाच्वंगु दु व फुक्कं फयेगं खः धकाः नेता किरणं दावी यानादिल ।
वय्कलं आः तक प्रचण्डलिसे राजीनामाया खँ जूगु नं मदुनि अले प्रचण्डं राजीनामा बिइगु धकाः धाःगु नं मदुनि धकाः नं कनादिल ।
पार्टीया नायः प्रचण्डं पार्टी शान्ति प्रक्रियाय् वये धुंकाः गुलि नं खँ धायेगु धकाः धयाः वयाच्वंगु खः व खँ छुं नं लागू यानाच्वंगु हे मदु धकाः नं नेता किरणं धयादिल । उकिं वय्कःया राजीनामाया खँ महत्वया विषय मखु, आःया अवस्थाय् प्रचण्ड व न्वकु डा. बाबुराम भट्टराईया कार्यदिशा असफल जुइ धुंकूगुलिं थःपिन्सं ज्वनाः वयाच्वनागु क्रान्तिकारी कार्यदिशा ज्वनाः वय्कःपिं वने फु कि मफु धैगु हे खँ खः धकाः नं कनादिल ।
प्रचण्ड व बाबुराम संसदवादय् फसे जुयावनाच्वंगु नापं पार्टीया क्रान्तिकारी कार्यदिशा त्वःताः दक्षिणपन्थी कार्यदिशा ज्वनाः वनाच्वंगु दु धयादिसें वय्कलं पार्टीया कार्यदिशा जनविद्रोह हे खः, जनवादी क्रान्ति सम्पन्न यायेगु नितिं प्रचण्ड व बाबुराम न्ह्याः वनी ला कि मवनी धैगु हे मू खँ खः धकाः नं धयादिल ।
प्रचण्ड व बाबुरामं हे जनमुक्ति सेनायात आत्मसमर्पण याकूगु खः धयादिसें संविधानसभा भंग जुइ धुंकूगु अवस्थाय् प्रचण्ड—बाबुरामया कार्यदिशा असफल जूगु दु
अथे हे पार्टीया नायः प्रचण्ड व न्वकु भट्टराई नं थःपिनिगु कार्यदिशा आः पूर्ण रुपं असफल जुल धकाः स्वीकार यायेगु नापं गम्भीर गल्तीयात आत्मसात यासें गम्भीर प्रकारं आत्मआलोचना यानाः क्रान्तिकारी कार्यदिशाय् वइ ला कि वइमखु थ्व हे पार्टी एकताया नितिं मू खँ खः धयादिसें बरिष्ठ न्वकु किरणं प्रचण्डया राजीनामा लिपा पार्टी एकता जुइगु, अले क्रान्तिकारी समूहया असार महिनाया २ गतेनिसें ४ गते तक स्वन्हुयंकं येँय् जुइगु राष्ट्रिय भेला स्थगित जुइ धकाः वयाच्वंगु खँ भ्रम जक खः धकाः धयादिसें राष्ट्रिय भेला गुगु नं हालतय् स्थगित जुइमखु धकाः नं धयादिल ।
शान्ति प्रक्रियाय् पार्टी वसांनिसें आः तकया दुनेया गतिविधि स्वयेगु इलय् पार्टीया नायः प्रचण्ड व प्रधानमन्त्री डा. बाबुरामयात विश्वास यायेगु थाय् नं मदयाः वनाच्वन धयादिसें बरिष्ठ न्वकु किरणं धयादिल ‘पार्टी तछ्याइगु धैगु सुनां पार्टीया बास्तविक क्रान्तिकारी कार्यदिशा त्वःती वं हे पार्टी तछ्याःगु जुइ, व हे फुट परष्ट जुइ, वं हे पार्टी तछ्याःगु ठहर जुइ ।’
