सेना समायोजन खः ला कि विर्सजन खः ? लडाकुत

येँ (झीगु स्वनिगः)

सेना समायोजन ल्ययाः शिविरय् च्वनाच्वंपिं लडाकुतय्सं थःपिन्त अलपत्रय् लाकल धकाः असन्तुष्टि प्वंकूगु दु । आः छुं दिंया दुने हे सेनाय् वनेत तयार जुयादिसँ धकाः येँय् लिहां वःपिं विशेष समिति सचिवालय निला दये धुंकाः नं लिहां मवयेवं लडाकुय्सं सचिवालय्या ज्याकुथिइ फोन यानाः थ्व समायोजन खः ला कि विर्सजन खः धकाः न्ह्यसः तयेगु यानाच्वंगु दु ।

विशेष समितिया सचिवालय्या कजि बालानन्द शर्मां संचारकःमितय्त धयादिल ‘न्हिइ ’१०÷१५ कल फोन लडाकुतय्गु वइ । अले इमिसं न्यनी जिमिसं छु पाप यानागु दु थ्व विजोगय् लाकेत ? थ्व समायोजन खः ला कि विसर्जन खः ?’ । लडाकुतय्सं तइगु अज्वःगु न्ह्यसःया लिसः बिइत सचिवालय्या कर्मचारीत लिसः विहिन जुयाच्वंगु दु । कजि शर्मां धयादिल ‘जिमिसं याकनं वयेगु जुइ धायेगु बाहेक जिमिके मेगु लिसः मदु ।’

प्रधानमन्त्री डा. बाबुराम भट्टराईयात तःक्वःमछि हे ध्यानाकर्षण यानाः नं छुं हे प्रगति मजुल धकाः न्ह्यथसें वय्कलं धयादिल ‘प्रधानमन्त्रीयात धाधां धाधां जि ला थाकेजुल । जिं थू धकाः धायेगु बाहेक मेगु छुं हे धाःगु मदु ।’ विशेष समितिं लोकसेवा आयोग व सेनाया प्रतिनिधि दुगु छनौट समिति गठन याये धुंकूगु दु तर समितिं छु यानाच्वंगु दु धकाः आः तक नं विशेष समितिया दुजःतसें छुं हे स्यूगु मदु ।

विशेष समितिया दुजः रामशरण महत्रं धयादिल ‘आः तकया दुने ज्या जूगु मदुनि धाःगु न्यनागु दु । तर छु जुयाच्वंगु दु मस्यू । सरकारं नं थुगु विषययात कयाः चासो तयाच्वंगु मदु ।’