जनजातितय्सं संघीयता विरोधीतय्गु पुत्ला च्याकल

‘संकल्पं न्हूगु विकल्प वइ’

येँ (झीगु स्वनिगः)

नेपाःया आदिवासी जनजातितय्सं म्हिगः आइतवाःनिसें संविधानसभा विघटन याःपिं ब्रम्हुवादीतय्गु विरुद्ध भण्डाफोर सभा न्ह्याकूगु दु । यलया मंगलय् म्हिगः जूगु उगु सभाय् संघीयता विरोधीतय्गु पुत्ला तकं च्याकेगु ज्या याःगु दु । आदिवासी जनजाति संयुक्त संघर्ष समिति व नेपाल आदिवासी जनजाति महासंघया ग्वसालय् जूगु उगु भण्डाफोर सभा क्वचायेवं संविघानसभा विघटन याःपिं संघीयता विरोधीतय्गु धकाः पुत्ला च्याकेगु ज्या याःगु खः ।

जनजातिय्सं अथे भण्डाफोर सभा देय्न्यंकं न्ह्याकीगु नापं संघीयता विरोधीतय्गु पुत्ला नं च्याकेगु ज्या यायेगु जुइ धकाः धाःगु दु । म्हिगः आइतवाः सनिलय् यलय् जूगु उगु भण्डाफोर सभाय् एमालेया पोलिटब्यूरो दुजः रामचन्द्र झा नं थःपिं पार्टी दुने जातीय पहिचानया आधारय् राज्य पुनर्संरचनाया नितिं संघर्ष यानाः च्वनागु खः धकाः धयादिसें आः केन्द्रीय कमिटीपाखें आदिवासी जनजाति, मधेसीनिसें राज्यं बहिस्करणय् लाकातःपिं समुदायया माग सम्वोधन मयात धाःसा उगु पार्टी त्वःताः न्हूगु शक्ति निर्माण यायेगु जुइ धकाः धयादिल ।

वय्कलं पहिचानया आधारय् राज्य पुनर्संरचना यायेगु विषययात कयाः एमालेया नेतृत्वं झंगःलात धयादिसें आःया अवस्थाय् संकल्पं न्हूगु विकल्प लुयावइ धकाः नं दावी यानादिल । वय्कलं एमालें पहिचानया आधारय् राज्य पुनर्संरचना यायेगु धकाः नेता व कार्यकर्तातय्त झंगःलानाच्वंगु खँ न्ह्यथसें आः पहिचानया आधारय् संघीयताया विरोध याइपिं नेतातय्त जनतां भण्डाफोर यायेमाः धकाः बः बियादिल । वय्कलं माओवादीया नायः पुष्पकमल दाहाल प्रचण्ड व प्रधानमन्त्री डा. बाबुराम भट्टराई नं तकं पहिचानया आधारय् संघीयता मबिइगु नितिं थीथी कथंया सम्झौता यानाः जालझेल याःगुलिं नं लिपांगु इलय् संविधानसभा भंग जुइगु अवस्था तकं थ्यंगु खः धकाः स्पष्ट यानादिल ।
ज्याझ्वलय् एमालेया नेता नापं जनजाति महासंघया पुलांम्ह नेता पासाङ शेर्पां आःया अवस्थाय् एमालेयात थःम्हं त्वःते धुनागु दु धयादिसें एमालेया आदिवासी जनजाति, मधेसी नेतातय्सं अलमल यानाः मच्वंसे छगू ठोस निर्णय यानाः न्ह्याः वनेमाःगु ई वल धयादिल ।

अथे हे नेपाली कांग्रेसया नेता इन्द्रबहादुर गुरुङ आखिर खय् ब्रम्हुत अन्तिम इलय् वयाः न्ह्यागु हे पार्टीया नेता जूसां छथाय् च्वनाः आदिवासी जनजातिय्त हक अधिकार मबिइत जालझेल यायेगु ज्या यात धकाः धयादिल । अथे हे जनजाति महासंघया नायः राजकुमार लेखीं आःया अवस्थाय् आदिवासी जनजातिय्गु शक्ति निर्माण यानाः वनेमाःगु खँय् बः बियादिसें सर्वपक्षिय राजनीतिक सम्मेलन यानाः समस्या समाधान यायेमाःगु ई वल धकाः धयादिल ।

एकीकृत नेकपा (माओवादी)या एकीकृत नेवाः राष्ट्रिय मुक्ति मोर्चा नेपाःया नायः पवनमान श्रेष्ठया सभापतित्वय् जूगु उगु ज्याझ्वलय् एकीकृत नेवाः मोर्चाया मञ्जली शाक्यं सुभाय् न्वचु बियादीगु खः । उगु भण्डाफोर सभाय् ब्रम्हुवादी नेतातय्गु भण्डाफोर यायेगु नापं संविधानसभायात भंग याःगु षडयन्त्रयात कयाः न्वंवायेगु याःगु खःसा द्वलंद्वःम्ह आदिवासी जनजाति नापं नेवाःतय्सं ब्वति कयादीगु खः ।