प्रमया सल्लाहकारयात कारवाही
येँ (झीगु स्वनिगः)
संयुक्त लोकतान्त्रिक मधेसी मोर्चायात काउन्टर बिइगु नितिं धकाः संविधानसभाया ्रम्याद अन्तिम ई थ्यंगु इलय् फुक्क दलया मधेसी मोर्चा नेतात च्वनाः दयेकूगु बृहत्त मधेसी मोर्चां स्वम्ह नेतातय्त कारवाही याःगु दु । प्रधानमन्त्री डा. बाबुराम भट्टराईया प्रेस सल्लाहकार रामरिझन यादव नापं प्रभु साह व राजकुमार शर्मायात अथे मोर्चा कारवाही याःगु खः ।
कारवाहीलय् लाःपिं इपिं स्वंम्हं हे एकीकृत माओवादीया नेतात खः । इमिसं बृहत्त मधेसी मोर्चायां आचार संहिता उल्लंघन याःगु धकाः द्वपं बियाः अथे कारवाही यानाः मोर्चाया फुक्क हे जिम्मेवारीं मुक्त याःगु दु । म्हिगः शनिवाः येँय् पत्रकार सम्मेलन यानाः बृहत्त मधेसी मोर्चाया कजि उपेन्द्र यादव, शरदसिंह भण्डारी लगायतया नेतातय्सं अथे स्वम्ह नेतातय्त करवाही यानागु जुल धकाः घोषणा याःगु खः । उगु घटनायात कयाः मनूतय्सं बृहत्त मधेसी मोर्चा कुचा जुल धकाः नं धायेगु यानाहःगु दु ।
