बैद्ययात नायः, बादलयात प्रम दयेकूसा पार्टी तज्याइमखु : बिप्लब

येँ (झीगु स्वनिगः)

एकीकृत माओवादी स्थायी समितिया दुजः नेत्रविक्रम चन्द विप्लबं पार्टी एकताया नितिं विचारया नेतृत्व व पार्टीया रुपान्तरण जुइमाः धकाः बः बियादीगु दु । वय्कलं पार्टीया नायः पुष्पकमल दाहाल प्रचण्ड व प्रधानमन्त्री नापं पार्टीया न्वकु डा. बाबुराम भट्टराईया नेतृ्त्व व विचार असफल जुइ धुंकूगु जुयाः आःया नेतृत्व हस्तान्तरण यानाः जक पार्टी एकता सम्भव जुइ धकाः स्पष्ट यानादीगु दु ।

वय्कलं धयादिल ‘पार्टी दुने विचारया नेतृत्व बरिष्ठ न्वकु मोहन बैद्य किरणं यानाच्वंगुलिं आः प्रचण्डं त्वःताः नायः पद बैद्ययात बिइमाः । प्रधानमन्त्री आः पार्टीया मूछ्याञ्जे रामबहादुर थापा बादलयात बिइमाः । थथे जुल धाःसा पार्टी एकता जुइ ।’ नेता विप्लबं प्रचण्ड व भट्टराई निम्हेस्यां नेतृत्व हस्तान्तरण मयात धाःसा इपिं पार्टीं विस्थापित जुयाः वनी धकाः नं ख्याच्वः बियादिल । जेठ ३० गते दुने विचार व सरकारया नेतृत्व लःल्हायेगु ज्या जुल धाःसा जक पार्टी एकता जुइगु संभावना दु धकाः स्पष्ट यानादिल । संचारकःमितलिसे खँल्हायेगु झ्वलय् वय्कलं म्हिगः शनिवाः अथे धयादीगु खः । नेता चन्दं धयादिल ‘असार १ गतेलिपा पार्टी न्हूगु कथं वनी । विचार व नेतृत्वय् असफल जूपिं थवं थवय् हे चिलावनी ।’ विचार नेतृत्वया असफलतां हे संविधानसभा विघटन, लडाकुयात आत्मसमर्पण याकूगु व सरकार असफल याःगु खः धकाः द्वपं नं बियादिल । लिपांगु इलय् राष्ट्रपति डा. रामवरण यादवं ल्ह्वनादीगु पलाः लसकुस यायेबहः जू धयादिसें वय्कलं डा. बाबुराम भट्टराई असफल जूगु शान्ति, संविधान व सहमति कायेम याये मफुम्ह प्रधानमन्त्री चीकेगु ज्या मजुल धाःसा मुलुक द्वन्द्वय् वनीगु ख्याच्वः तकं बियादिल । वय्कलं्र पार्टीपाखें माग याःगु सर्वपक्षीय गोलमेच सम्मेलनय् कांग्रेस व एमाले सहभागी जुयाः उकिया माध्यमं सहमतिया सरकार निर्माण यायेमाःगु ई वल धयादिसें उकिया नितिं आह्वान तकं यानादिल ।

थ्व हे दथुइ एकीकृत माओवादीया नायः प्रचण्ड विचार समूहया प्रभावशाली नेता हरिबोल गजुरेलं प्रचण्डं नायः पद त्याग यायेत तयार जूगु दु धकाः सार्वजनिक रुपं जानकारी बियादीगु दु । वय्कलं पार्टीया बरिष्ठ नेता मोहन बैद्य किरणयात नायः पद लःल्हायेगु खँय् छुं नं कथंया आपत्ति मदु धयादिल । नेता गजुरेलं धयादिल ‘किरणजीं न्हापा महामन्त्री पद त्याग यानाः प्रचण्डयात लःल्हाःगु खः । आः प्रचण्डं त्याग यानाः किरणयात नायः पद लःल्हायेगु छुं हे तःधंगु खँ मखु । प्रचण्डं पार्टी तछ्याकेगु ज्या याये मजिउ, बरु त्याग यायेमाः । हाकनं महाधिवेशन यानाः नायः जुइम्ह ला प्रचण्ड हे खः ।’