कांग्रेसया नेतातसें नं पार्टी त्वःतीगु
येँ (झीगु स्वनिगः)
एमालेया आदिवासी जनजाति व मधेसी नेतात गुगु कथं पार्टी त्वःतेत तयार जुयाच्वंगु दु अथे हे नेपाली कांग्रेसया नेतातय्सं नं पार्टी त्वःतेत तयारी यानाच्वंगु दु । कांग्रेसया आदिवासी जनजातिनिसें मधेसी नेतातय्सं अथे पार्टी त्वःतेगु तयारी यानाच्वंगु दु धकाः सूत्रं धाःगु दु । कांग्रेसया छम्ह नेतां आःया अवस्थाय् अप्वः यानाः आदिवासी जनजाति व मधेसी नेतात पार्टीं जातीय पहिचानयात विरोध यानाः संघीयताया तकं विरोध यानाः ब्रम्हुवादी दलया रुपय् न्ह्याः वनाच्वंगुलिं पार्टी त्वःतेत तयारी यानाच्वंगु खः धकाः धाःगु दु ।
आः आदिवासी जनजाति, मधेसी नापं राज्यं बहिस्करणय् लाकातःपिं समुदाययात न्ह्यःने यंकेगु नितिं अथे पार्टी त्वःताः ब्यागलं कथंया पार्टी दयेकाः वनेगु तयारी याःगु खः । अथे आदिवासी जनजाति नापं मधेसीतय्सं पार्टीयात त्वःतल धाःसा कांग्रेस ब्रम्हुवादी पार्टी जुइगु स्पष्ट जुयावःगु दु ।
