‘संसद्या चुनाव कांग्रेसया डिजाइन’
प्रधानमन्त्री पदमुक्त जुइ धुंकल : कांग्रेस नेता महत
येँ (झीगु स्वनिगः)
नेपाली कांग्रेसं संविधानसभाया माध्यमं न्हूगु संविधान निर्माण यायेगु ज्या मयासे संसद्या चुनाव वनेगु डिजाइन यानाच्वंगु स्पष्ट जूगु दु । संघीयता विरोधी नापं पहिचानया अधारय् राज्य पुनर्संरचनाया विपक्षय् दुगु नापं पुलांपिं जुजुवादी शक्तितय्त मंकाः राजनीतिक रुपं मोर्चाबन्दी याःगु धैगु हे संविधानसभाया चुनाव मयासे संसदया चुनाव यायेगु नितिं खयेमाः धकाः अनुमान यानाहःगु दु ।
माओवादी ‘हावी’ दुगु संविधानसभायात विघटन यायेगु कथंया योजना न्हापांनिसें दयेकाः आः वयाः राष्ट्रपतियात सक्रिय यानाः नेतात जक जानाः न्हापालिपा थें हे संविधान दयेकेगु व जनतायात सार्वभौम अधिकार मबिइगु योजना दयेकाः न्ह्याः वना च्वंगुलिं आःया राजनीतिक अवस्था ब्वलंगु खः धकाः मनूतय्सं टिप्पणी यानाहःगु दु ।
उकिं हे आः वयाः थीथी दलतय्त दुथ्याकाः मोर्चाबन्दी यानाच्वंगु खयेमाः धकाः नं धयाहःगु दु ।
न्हूगु संविधान निर्माणया नितिं धकाः जनतां ल्ययाः छ्वःपिं सभासद्त च्वनाः संविधान दयेकेगु थाय् संविधानसभा विघटनया नितिं दक्ले तःधंगु भूमिका म्हितूगु कांग्रेसया नेतातय्सं आः संविधानसभाया चुनाव मखु संसदया चुनाव यायेमाः धकाः सार्वजनिक रुपं न्वंवानादीगुलिं कांग्रेस न्हापांनिसें संविधानसभा विरोधी खः धकाः स्पष्ट जूगु खः ।
कांग्रेसं आः संविधानसभाया चुनाव मखु संसदया चुनाव गुगु नं इलय् जुइ फुगु तायेकाः थःगु पार्टीया कार्यकर्ता नापं नेतातय्त जनतायाथाय् वनेत तकं निर्देशन बिइ धुंकूगु दु ।
थ्व हे झ्वलय् म्हिगः बुधवाः येँय् जूगु छगू साक्षात्कार ज्याझ्वलय् कांग्रेसया नेता रामशरण महतं आः संविधानसभाया मखु संसदया चुनाव यायेमाः धकाः न्वंवानादीगु दु । वय्कलं असंवैधानिक सरकारं घोषणा याःगु निर्वाचनय् थःपिं गुगु नं हालतय् वनेगु जुइमखु धकाः नं स्पष्ट यानादिल ।
केन्द्रीय नेता महतं प्रधानमन्त्री डा. बाबुराम भट्टराईयात राष्ट्रपति डा. रामवरण यादवं पदमुक्त याये धुंकूगु दु धकाः दावी यानादीगु दु । वय्कलं राष्ट्रपतिया लिपांगु बक्तव्यपाखें नं प्रधानमन्त्री भट्टराई नं वइगु मंसीर ७ गते यायेगु धकाः घोषणा याःगु संविधानसभाया चुनाव असंवैधानिक कदम खः धकाः राष्ट्रपतिया वक्तब्यं प्रमाणीत यानाब्यूगु दु धकाः दावी यानादिल । वय्कलं धयादिल ‘आ हाकनं संविधानसभाया निर्वाचन जुइफैमखु । चीधंगु आकारया प्रत्यक्ष निर्वाचित संसद जुइगु कथं संसदया चुनाव यायेमाः ।’
