वृहत्त नेवाः मंकाः मोर्चाया दयेकेत आह्वान
येँ (झीगु स्वनिगः)
एकीकृत नेकपा (माओवादी)या एकीकृत नेवाः राष्ट्रिय मुक्ति मोर्चा नेपाःपाखें उत्पीडित वर्ग, जाति, क्षेत्र, लीङ्ग व समुदायया अधिकार स्थापित नापं सुनिश्चितता व नेवाः स्वायत्त राज्यया नितिं आःया अवस्थाय् नेवाःतय्गु बृहत्त मोर्चा दयेकेत आह्वान याःगु दु । मोर्चाया केन्द्रीय नायः पवनमान श्रेष्ठ व मूछ्याञ्जे देवेन्द्र श्रेष्ठं म्हिगः मंगलवाः जारी यानादीगु विज्ञप्तिइ उगु कथं आह्वान यानातःगु दु ।
विज्ञप्ति धयातःगु दु ‘उत्पीडित जातिया हकय् एकल पहिचान सहित स्वायत्त राज्य नापं झीगु सन्दर्भय् नेवाः राज्य, अग्राधिकार, पूर्ण समानुपातिक निर्वाचन प्रणाली, राज्यया फुक्क तह व अंगय् समानुपातिक नापं समावेशिताया ग्यारेण्टी याकेमाः । उकिया नितिं फुक्क कथंया प्रतिक्रियावादी पार्टी, नेता व वैदेशिक हस्तक्षेपया भण्डाफोर यायेमाः । उकिं आन्तरिक राष्ट्रियताया आन्दोलन व वाह्य राष्ट्रियताया नितिं राष्ट्रिय स्वाधिनताया सशक्त आन्दोलन यायेत फुक्क उत्पीडित वर्ग, आदिवासीजनजाति, लीङ्ग व समुदाय छप्पँ जुयाः दनेमाःगु आवश्यक दु । उकिया नितिं वृहत्त मंकाः मोर्चा थौंया आवश्यकता खः नापं जिमिगु मोर्चा वृहत्त संयुक्त मोर्चा निर्माणया नितिं इनाप यानागु दु ।’
विज्ञप्तिइ झिदँया महान् जनयुद्ध व १९ दिंया ऐतिहासिक जनआन्दोलनपाखें प्राप्त ऐतिहासिक उपलब्धी संविधानसभायात कथित प्यंगू दलया प्रमुख नेतातय्सं संविधानसभायात पूरा हे वन्दी यानाः जनताया थःम्हं हे संविधान दयेकेगु ऐतिहासिक दायित्व पुरा याके मबिइत अन्ततः वंगु जेठ १४ गते संविधानसभा विघटन यानाः देश व जनतायात गंभीर विश्वास घात याःगुलिं घोर भत्सर्ना व निन्दा यानागु दु धकाः न्ह्यथनातःगु दु ।
भारतीय विस्तारवादया हस्तक्षेप व थनया प्रतिक्रियावादी पार्टीतय्गु भुमिकायात ध्यान बियाः एकीकृत माओवादीं जनविद्रोहया कार्यदिशा दयेकूगु तर बाबुराम—प्रचण्डं शान्ति व संविधानया कार्यदिशा धकाः जनमुक्ति सेनायात आत्मसमर्पण व विघटन यानाः गुगु कथं संविधान दयेकेगु नामाय् संविधानसभायात स्वंगू प्रमुख दलया नेता व विवाद समाधान उपसतिपाखें कैद यानाः ६०१ सभासद्तय्त जोकर यानाःु, जनमुक्ति सेनाया विघटनलिपा प्रतिक्रिवादीत, संघीयता विरोधी एमाले, काँग्रेसया सुनियोजित चाल नापं बाबुराम—प्रचण्डया उक्साहटय् अखण्डवाला र ब्राम्हणक्षेत्रीतय्गु कथित आन्दोलनपाखें पहिचान सहितया संघीयता निर्माण मयाकेगु षडयन्त्र याःगु व हे त्वहः तयाः स्वंगू दलया शीर्ष नेतातसें विना नामाङ्कन व सिमाङ्कन नापं विना पहिचानया ११ प्रदेशय् सहमति याःगु, भारतीय विस्तारवादया गुरुयोजनाय् जूगु उगु सहमतियात माओवादीया क्रान्तिकारी पक्ष व आदिवासी जनजाति नापं उत्पीडित समुदायया आन्दोलनं खारेज याःगु खँ नं न्ह्यथनातःगु दु ।
पहिचान सहितया संघीयताया पक्षय् संविधानसभा दुने स्पष्ट कथं दुईतिहाई मत दयेवं फुक्क प्रतिक्रियावादीत संविधानसभा विघटन यायेगुपाखे वंगु, संविधानसभाया नायः सुवासचन्द्र नेवाङ्गयात एमाले—काँग्रेसं संविधानसभा विघटन याकेगु ल्वाभःया रुपय् प्रयोग याःगु व संविधानसभाया बैठक हे मतसे विघटन याःगु अले नेम्वाङयात माःगु भूमिका म्हितकेत प्रचण्ड—बाबुरामं छुं नं कथंया भूमिका मम्हितूगु बरु ११ प्रदेशय् सहमति यायेगुनिसें संविधानसभा विघटन यानाः सत्तास्वार्थ यायेत केन्द्रीत जुयाः जनताया संविधान दयेकेगु ज्याय् पूरा हे उदासिन जूगु, अले अःखतं थःपिनिगु हे नेतृत्वय् चुनाव यायेगु नाटक तकं याःगुलिं इपिं नेतात व पार्टीत यथास्थिति हे मेगु संविधानसभाया चुनाव यायेगु षडयन्त्र याःगुलिं मेगु संविधानसभां नं संविधान दयेके फैगु अवस्था मदुगुलिं आः नेवाःतय्गु मंकाः मोर्चा दयेकाः वनेमाःगु अवस्था वल धकाः न्ह्यथनातःगु दु ।
