संघीयता विरोधीपिनि षडयन्त्र ओखरपौवाय् फोहर वाके मबिल
राज्य पुन्संरचना आयोग व संविधान सभाया राज्य पुनर्संरचना व राज्य शक्तिया बाँडफाँड समितिया प्रतिवेदनकथं राज्य पुनर्संरचना जुइगु ख:सा नेवा: राज्य दुने हे लाइगु नुवाकोट जिल्ला ओखरपौवा गाविसया छथ्व: मनूतसें नेवा: राज्य मा:गु मदु धासें येँ महानगरपालिकाया फोहर वायेगु गाडी दुकायेगु गाडी दुकायेके मबिल । नगरपालिका व नाप वार्ता जूसां वार्ता सफल मजुल ।
न्हापा ला येँ महानगरपालिकाया फोहर धइगु नेवा:तसें जक उत्पादन या:गु फोहर मखु, स्थानीय विकास मन्त्री व येँ महानगरपालिकाया कार्यकारी अधिकृत नं नेवा: मखु । उलि जक मखु, उगु गाविसयापिसं फोहर तयेकेत अनेक पूर्वाधार विकासलिसें रोजगारीतकया सुविधा नं कयात:गु दु । तर छाय् थुकथं छथ्व: मनूतसें फोहर वायेगुली पंग: थन ?
थ्व निश्चितरुपं नेवा: स्वायत्त राज्यया माग यानाच्वंपिं हतोत्साही यायेगु व जातीय पहिचानया नांयात जातीय राज्य धका: धया: ल्वापुख्यापु, झञ्झट वइ धका: हल्ला मचे याइपिन्त तिब: बीगु ज्या याइगु खनेदु । थ्व फटाहतसें थनाब्यूगु ज्या ख: । झीपिं नेवा: स्वायत्त राज्यया प्राप्तिपाखे गुलि सतिना वनी, अन्तिम इलय् वया: थुकथं गडबडी याइपिं आपालं हे वइ । गनतक येँ देय् दुनेया फोहर व्यवस्थापन यायेगु जक सवाल दु, न्हापा थन उत्पादन जूगु फोहर थन दुने हे व्यवस्थापन जू । जर्मन आयोजना वया: तिनि टेकु ट्रान्सफर स्टेशन जुया: मूलपानी गाविसय् फोहर वाइगु जूगु ख: धा:सा मूलपानीइ फोहर वायेगु थाय् जा:गुलिं नुवाकोटया ओखरपौवाय् वनेमा:गु ख: । थन उत्पादन दूगु फोहर मल दयेका: थन हे उपभोग नं यायेत आ: उपयो यायेगु बुँ नं स्वनिगलय् दुन मदये धुंकल । थन पिनें व:पिं मनूतय्गु हे छेँ टन्न दये धुंकल । थुकिं छथी ला थनया फोहर उत्पादन यात तसकं उप्वयेका बिल धा:सा मेखे फोहर सुचुकेगु थाय् म्हो यानाबिल । उकिं फोहरया कारक तत्व मेपिं मखु स्वयम् गैरनेवा:त हे ख: धका: थुइकेत थाकु मजू । मेगु खँ छगू सम्झौताकथं ओखरपौवावासीतसें फोहर वायेके बीगु जुसेंलि हानं हानं अनेक त्वहलय् फोहर वायेके मबीगु पाय्छिगु ज्या मखु । थुज्व:पिन्त सरकारं कारवाही यायेमा: । फोहर वायेगु ज्या नं टेलिफोन, बिजुली, हुलाक, खानेपानी थुज्व:गु अत्यावश्यक सेवा ख: । थुज्व:गु अत्यावश्यक सेवाया ज्याय् नं सुं कर्मचारीतसें हडताल हे याये दु, न सुनां नं गुगुं कथं पंग:, अवरोध सिर्जना यायेमदु । थुकथं अवरोध सिर्जना या:पिं मनूतय्त कारवाही जुइमा:गु ख: । ओखरपौवाया मनूतसें न्हापा किड्नीया विरामीयात उपचार यानाबीमा: धका: नं फोहर पनेगु ज्या यात । थुकथं अनेक त्वहलय् फोहर वायेगु दिकेगु ज्या यायेत मनूत माहिर जूगु धइगु हद थ्यंकया स्थिति मखुला ?
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
