आन्दोलनय् घाःपाः जूपिं नेवाःतय्त हन, किपूमितय्गु डेलिगेशन
येँ (झीगु स्वनिगः)
आदिवासी जनजातिय्सं आह्वान याःगु स्वन्हुयंकंया आमहड्तालया झ्वलय् प्रहरीया हस्तक्षेपय् लानाः घाःपाः जूपिं व प्रहरीं गिरफ्तार याःपिं नेवाः कार्यकर्तातय्त म्हिगः शनिवाः छगू ज्याझ्वःया दथुइ हनेज्या यात । नेवाः स्वायत्त राज्य मंकाः संघर्ष समितिं न्यय्म्हं मल्याक नेवाः कार्यकर्तातय्त अथे हनेज्या याःगु खः ।
थ्व हे दथुइ नेवाः स्वायत्त राज्यया माग यानाः म्हिगः शनिवाः नेवाः स्वायत्त राज्य मंकाः परिषद् किपूपाखें किपुलिइ जुलुस पिकाल । लोकतान्त्रिक चोकं पिकाःगु उगु जुलुस किपू, पांगा व नगामय् चाःहिलाः बाघभैरवस्थानय् थ्यंकाः क्वचायेकूगु खः । अथे म्हिगः शनिवाः हे मंकाः परिषद् किपूया प्रतिनिधिमण्डल एकीकृत माओवादीया नायः पुष्पकमल दाहाल प्रचण्ड निवासय् डेलिगेशन वंगु खः ।
किपूया सभासद् प्रचण्डया निवासय् वनाः नेवाः स्वायत्त राज्य सुनिश्चित यायेत नापं जातीय पहिचानया आधारय् राज्य पुनर्संरचना यायेमाः धकाः माग याःगु खः । सभासद् दिलिप महर्जन, मंकाः परिषद्या नायः पुचःया कजि पञ्चलाल महर्जन, नायः पुचःया दुजःपिं नजरराम महर्जन, कृष्णहरी महर्जन, छ्याञ्जे श्रीकृष्ण महर्जन, अथे हे दुजःपिं सुनिता शाक्य, अष्टमान महर्जन, केशरत्न बज्राचार्य, सिजन महर्जन, विनोदलाल महर्जन, अमृत महर्जन व नरेश नापितपिं अथे डेलिगेशन वंगु खः ।
