बैकल्पीक शक्तिया रुपय् दनेगु उद्घोष

जातीय पहिचानया आधारयात त्वःतेगु जुइमखु : किरण

येँ (झीगु स्वनिगः)

जनयुद्ध व जनआन्दोलनया उपलब्धीं उत्पीडित जाति, जनजाति, वर्ग, क्षेत्र, लिङ्ग, दलित मस्लिमलगायतया हकअधिकार सुनिश्चित मजुल धाःसा वैकल्पिक शक्तिको कथं थःपिं न्ह्याः वनेगु जुइ धकाः एकीकृत नेकपा (माओवादी)या वरिष्ठ न्वकु मोहन वैद्य ‘किरणं’ धयादिल । म्हिगः शनिबार सांस्कृतिक दिवस नापं पत्रकार कृष्ण सेन ‘इच्छुक’या स्मृतिसभा अखिल नेपाल जनसांस्कृतिक महासंघ व क्रान्तिकारी पत्रकार संघं मंकाः कथं ग्वसाः ग्वःगु खःसा उगु हे ज्याझ्लय् नेता किरणं अथे न्वंवानादीगु खः ।
‘‘उत्पीडित वर्ग, जाति, जनजाति, महिला, दलित, मुस्लिमलगायतयात मुक्ति बिइगु नितिं जनयुद्ध यानागु खः, इमिसं ल्ह्वननच्वंगु मुद्धा जायज खः ।’’ वय्कलं धयादी, ‘‘संविधानसभाया राज्य पुनःसंरचना तथा राज्य शाक्ति बाँडफाँड समितिं हःगु १४ प्रदेश, एकल जातीय पहिचान ठिक दु, १४ प्रदेश व एकल जातीय पहिचान नापं पूर्ण समानुपातिक निर्वाचन गुगु नं हालतय् त्वःतेगु जुइमखु ।’’

जेठ १४ गते विदेशी प्रभुतसें छ्वयाहःगु संविधान जारी याइगु सम्भावना अप्वयाः वःगु दु धयादिसें नेता किरणं धयादिल ‘शान्ति सम्झौताय् सेना समायोजना जूसां नं न्हूगु संविधान न्हूगु ढंगं यायेगु धाःसां नं यथास्थिति कथं हे संविधान दयेकेगु चलखेल जुयाच्वंगु दु ।’’ शीर्ष नेतात संविधान दयेकेगुलिइ असफल जुइ धुंकूगुलिं संविधानसभाया प्रक्रियापाखें विवादित विषययात समाधान मयासे अःखतं कचमच अप्वयेकेगु ज्या यानाच्वंगु दु धकाः न्ह्यथसें धयादिल ‘संविधानसभाया विवाद उपसमितिइ विवाद समाधान मयासे न्हून्हूगु कथं विवाद अप्वयेकेगु ज्या यानाच्वंगु दु । सहमतिपाखें निष्कर्ष मवल धाःसा बहुमतपाखे वनेमाःगु खः तर मतदानपाखे नं वनेत नेतात ग्यानाच्वंगु दु ।’’
वय्कलं आन्दोलन निष्कर्षय् थ्यने त्यंन धकाः न्ह्यथसें माओवादी पार्टीया नेतृत्वं जनतायात झंगःल्हात धकाः आपत्ति प्वंकादीगु दु । ‘‘गबले तक उत्पीडित जाति, जनजाति, वर्ग, क्षेत्र, लिङ्गया मुक्ति जुइमखु अबले तक बन्दुुक त्वःतेगु जुइमखु ।’’
वय्कलं धयादिल ‘‘तर सहिद, बेपत्ता व योद्धात योगदान नापं वलिदानया कदर मजुल ।’’ उगु हे ज्याझ्वलय् माओवादी स्थायी समितिया दुजः नेत्रविक्रम चन्द ‘विप्लबं’ थःगु पार्टीया नेतृत्वप्रति कडा शब्द प्रयोग यानाः छुं ईया नितिं जक जनतायात झंगःल्हायेफै तर आः न्हूगु चरणया आन्दोलनय् वनी धकाः विश्लेष यानादिल । क्रान्तिकारी पत्रकार संघका नायः नापं एकीकृत माओवादी केन्द्रीय दुजः महेश्वर दाहाल, कुष्ण सेनया कलाः तक्मा के.सी, इच्छुक प्रतिष्ठानया छ्याञ्जे डा. ताराकान्त पाण्डे, ज्याझ्वःया सभापति ईश्वरचन्द्र ज्ञवाली नापं मेमेपिन्सं न्वंवानादीगु खः ।