‘स्वन्हु तक लगातार देय् ठप्प’

येँ (झीगु स्वनिगः)

पहिचानया आधारय् राज्य पुनर्संरचना यायेमाःगु माग यानाः आन्दोलनय् क्वहां वयाच्वंपिं आदिवासी जनजातितय्गु आमहड्ताल म्हिगः मंगलवाः स्वन्हुया न्हिइ नं जुल । स्वन्हुय न्हिइ नं देय् ठप्प जुल । आन्दोलनकारी आदिवासी जनजातित म्हिगः मंगलवाः खुन्हु नं सुथंनिसें सतकय् क्वहां वल । सतकय् लगातार रुपं नारावाजी यानाच्वंगु खः ।

थाय् थासय् च्वनाः बन्द यानाच्वंगुलिं जनजीवन तसकं प्रभावित जुल । येँ, यल, ख्वप, थिमि, किपू, फँपि नापं स्वनिगःया थाय्थसय्, गां गामय् तकं यातायात, कलकारखाना, बजाः, शिक्षण संस्था ठप्प जुल । स्वनिगः पिने नं ठप्प जूगुलिं छगू कथं देय् हे ठप्प जूगु खः । आदिवासी जनजातितय्सं स्वनिगःया थाय् थासय् चक्रपथ लागाय् तकं सभा यायेगुनिसें प्रदर्शन याःगु दु । नेवाःत नाप नापं आदिवासी जनजातितय्सं थःथःपिनिगु ध्वाँय् ज्वनाः अथे लगातार रुपं प्रदर्शन याःगु खः । थ्व हे झ्वलय् द्वलंद्वःम्ह यलया नेवाःत यलंनिसें येँय् तक हे वयाः प्रदर्शन तकं यात ।

उकिं यानाः येया नेवाःतय्त उत्साहित यानाब्यूगु दु । यलय् नं मंगलय् सभा यात । अथे हे सनिलय् येँय् नं तःजिक जुलुस पिकयाः सभा याःगु दु । उगु सभाय् आदिवासी जनजातिया नेतात नापं नेवाः स्वायत्त राज्य मंकाः संघर्ष समितिया नेतातय्सं न्वंवानादीगु खः । आदिवासी जनजातिय्सं एकल जातीय पहिचानया आधारय् राज्य पुनर्संरचना यायेमाःगु, समानुपातिक निर्वाचन प्रणाली लागू यायेमाःगु, राज्यया फुक्क निकायलय् समानुपाति समावेशी प्रतिनिधित्व यायेमाःगु, आत्मनिर्णय नापं जातीय स्वायत्तता व स्वशासन लागू यायेमाःगु लगायतया माग यानाः आन्दोलन यानाः वयाच्वंगु खः ।

वार्ताय् सफल जुल थौं बन्द मजुइगु

प्रधानमन्त्री डा. बाबुराम भट्टराई, प्रमुख दलया शीर्ष नेतात एकीकृत नेकपा (माओवादी)या नायः पुष्पकमल दाहाल प्रचण्ड, नेपाली कांग्रेसया सभापति सुशील कोइराला, नेकपा (एमाले)या नायः झलनाथ खनाल व संयुक्त मधेसी मोर्चाया नेतातलिसे आन्दोलनरत आदिवासी जनजाति संयुक्त संघर्ष समितिया न्ह्यलुवाःतय्सं वार्ता यानाः गुंगू बुँदे सहमति याःगु दु । न्हू बानेश्वरया संविधानसभाया भवनय् बहनी ९ः४५ पाखे अथे सहमति जूगु खः । आदिवासी जनजातितय्गु माग पूवनेवं थौं बुधवाः बन्द यायेगु धाःगु बन्द नं स्वतः लित काःगु दु ।

थ्व हे दथुइ आदिवासी जनजाति संयुक्त संघर्ष समितिया म्हिगः मंगलवाः च्वंगु बैठकं वार्ताय् थःपिनिगु माग पूरा जुल धाःसा आन्दोलनयात दिकाः बुधवाः थौं हे येँया खुल्लामञ्चय् तःजिक सभा यायेगु लिसें जिल्ला जिल्लाय् नं सदरमुकामय् सभा यायेगु धकाः निर्णय याःगु खः । आः जूगु सहमति कथं संविधान समितिं पारित यानातःगु राज्यया संख्या व आदिवासी जनजाति संयुक्त संघर्ष समितिं न्ह्यब्वःगु थीथी मागत नं सम्बोधन जूगु दु । जातीय पहिचानया आधारय् प्रदेश वा राज्य दयेकेगु माग स्वीकृति जुइधुंकूगु दुसा संवैधानिक समितिं पारित यानातःगु झिंप्यंगू राज्यया अवधारणा कथं न्ह्यःने वनीगु जूगु दु ।