नेवाःतय् विशाल मोटरसाइकल र्याली
नेवाः स्वायत्त राज्यया माग यासें शुक्रवाः नेवाःतय्सं विशाल मोटरसाइकल र्याली पिथन । नेवाः राज्य प्राप्तिया निंतिं जेठ ६ गते नेवाःतय्सं यायेत्यंगु जनप्रदर्शनया प्रचार कथं पिहांवःगु उगु र्यालीइ स्वनिगःया द्वलंद्वः नेवाःतय्सं ब्वति काःगु खः ।
नेवाः स्वायत्त राज्य मंकाः संघर्ष समितिया ग्वसालय् येँया बसन्तपुलिं न्ह्याःगु उगु र्याली येँया दुनेया लागाः जुयाः दरवारमार्ग, त्रिपुरेश्वर, कलंकी, सीतापाइला, बनस्थली, गोंगबु, महाराजगञ्ज, चाबहिल, गौशाला, कोटेश्वर, थिमि, ख्वपः, ग्वार्को, पुलच्वः, एकान्तकुना, बल्खु, किपू, पांगा, कालिमाटी जुयाः त्रिपुरेश्वरय् वयाः क्वचाःगु खः ।
र्यालीइ येँया नापं, किपू, पांगा, थानकोट, यल, ख्वप, तोखा लगायत आपलं थाय्या नेवाःतय्सं उत्सहापूर्वक ब्वति काःगु खः । र्यालीइ ब्वति काःपिंसं सरकारं ब्रम्हु-क्षेत्रीतय्त नं आदिवासी जनजातितय् धलखय् लाकाः अझ नं नेवाःतय्त अधिकार मबिइगु कथं सहमति जूगुलिं थःपिं उकीया विरोधय् कुहांवयाःगु प्रतिक्रिया बिउगु दु ।
'नेवाःतय्सं तःतधंगु आन्दोलन याःसां थःपिनिगु माग पूमवंकूगु सरकारं ब्रम्हू-क्षेत्रीतय् छुं मनूतय्सं आन्दोलन यायेवं माग पूवंकलं, 'र्यालीइ ब्वति काःपिंसं धाल, 'आः नेवाः राज्य प्राप्त मजूतले झी आन्दोलित जुयाच्वनेगु जुइ ।'
शुक्रवाःया विशाल मोटरसाइकल र्यालीयात नेवाःतय्सं छगू ऐतिहासिक र्याली जूगु प्रतिक्रिया बिउगु दु । सम्भवतः न्हूदँया इलय् जुइगु मोटरसाइकल र्याली लिपाया दकलय् विशाल र्याली थुगु हे जुइगु दावी ग्वसाः खलकं याःगु दु ।
र्याली न्ह्याये न्ह्यः बसन्तपुली नेपाः लोकतान्त्रिक नेवाः संघया नायः केबी घःजु व सभा क्वचायेकेगु इलय् नेवाः स्वायत्त राज्य मंकाः संघर्ष समितिया नायः बाबुराजा बज्राचार्यं सम्बोधन यानादिसें सकल नेवाःतय्त जेठ ६ गते सतकय् कुहांवयाः शक्ति प्रदर्शन यायेत इनाप यानादिल ।
