स्वम्ह शीर्ष नेतातय्गु सहमति संविधानया अःखः मंकाः संघर्ष समिति
येँ (झीगु स्वनिगः)
नेवाः स्वायत्त राज्य मंकाः संघर्ष समितिं छगू विज्ञप्ति पिथनाः वंगु जेठ २ गते प्रमुख दलया शीर्ष नेतातय्सं याःगु सहमति खारेज यायेत माग याःगु दु । म्हिगः बुधवाःया तिथि तयाः जारी याःगु उगु सहमति नेपाःया अन्तरिम संविधान २०६३ या मर्म, भावनायाः अःखः नापं आदिवासी जनजातिय्गु पहिचान व हक अधिकारयात समाप्त यायेगु कथं जूगु खँ न्ह्यथसें आपत्ति प्वंकूगु दु ।
संविधान सभाया सार्वभौम अधिकार लाकाः गोप्य कथं सहमति यायेगु षड्यन्त्र बन्द यायेमाःगु, तुरुन्त हे संविधानसभाया नियमित प्रक्रिया न्ह्याकाः संविधान निर्माणया फुक्क ज्या क्वचायेकेमाःगु, क्वःछिनातःगु इलय् हे संविधान जारी यायेमाःगु, न्हूगु संविधानय् फुक्क आदिवासी जनजातिय्गु स्वायत्तता, स्वशासन, आत्मनिर्णय व अग्राधिकार सुनिश्चित यायेमाःगु व एकल पहिचानया आधारय् राज्यया पुनर्संरचना यायेमाःगु माग यानातःगु दु । थःपिनिगु माग पूरा मजुल धाःसा नेवाःत सशक्त कथं आन्दोलनय् क्वहां वयेत बाध्य जुइ धकाः नं ख्याच्वः बियातःगु दु ।
