पहिचानया सवालय् धु्रविकरण

येँ (झीगु स्वनिगः)

एकीकृत माओवादीया नायः पुष्पकमल दाहाल, कांग्रेसया सभापति सुशील कोइराला व एमालेया नायः झलनाथ खनालं झिंछगू प्रदेश निर्माण यायेगु विषययात कयाः सहमति जुइवं राजनीतिक दलया नेता कार्यकर्तात पहिचानया आधारय् राज्य पुनर्संरचना यायेमाः धाइपिं व म्वाः धाइपिनिगु दथुइ धु्रविकरण जूगु दु ।

एकीकृत माओवादीया नायः दाहाल व न्वकु डा. बाबुराम भट्टराई पक्षया नेता कार्यकर्तातय्सं नेतातय्गु सहमतियात कयाः समर्थन याःगु दुसा अथे हे बरिष्ठ न्वकु मोहन बैद्य किरण पक्षधरया नेता व कार्यकर्तातय्सं उकियात कयाः विरोध याःगु दु ।
बैद्य पक्षं उगु सहमति धैगु पहिचानया आधारय् राज्य पुनर्संरचना यायेगु पार्टीया निर्णय व अन्तरिम संविधानया भावनाया अःखः जूगुलिं नेतातय्सं झंगःलात धकाः धाःगु दु । अथे हे कांग्रेसया नं आदिवासी जनजाति नापं मधेसी नेतातय्सं उगु सहमतियात कयाः विरोध याःगु दुसा कांग्रेसया जनजाति नापं मधेसी नेतातय्सं विरोध याःगु दु ।
अथे हे आदिवासी जनजाति, मधेसी नापं राज्यं बहिस्करणय् लकातःगु समुदायया नेता व कार्यकर्तातय्सं उगु सहमतियात कयाः विरोध याःगु दु ।

इमिसं आः अन्तिम संघर्ष यायेमाःगु ई वल धकाः न्ह्यथसें सतक आन्दोलनय् क्वहां वःगु दु । विशेष यानाः स्वायत्त राज्य स्तरया जनजातियत्गु मंकाःगु वृहत्त मोर्चां ला सतक संघर्ष तकं घोषणा याःगु दु ।
पहिचान व सामथ्र्यताया आधारय् संविधानसभाया राज्य पुनर्संरचना नापं राज्य शक्ति बाँडफाँट समितिपाखें तयार याःगु १४ प्रदेशयात खारेज यायेगु कथं असंवैधानिक रुपं दलया नेतातय्सं अथे सहमति याःगु धैगु जनआन्दोलन व अन्तरिम संविधानया भावनाया अःखः जुल धकाः न्ह्यथसें आवंलि अझ सशक्त कथं आन्दोलन यायेगु जुइ धकाः सतकय् म्हिगः बुधवाःनिसें हे आदिवासी जनजातिया नेता व कार्यकर्तात देय्न्यंकं सतकय् क्वहां वःगु खः ।