प्यंगू दलया सहमतियात अस्वीकार

वैद्य समूहपाखें आन्दोलनया घोषणा

येँ( झीगु स्वनिगः)

प्यंगू दलया दथुइ सहमति जूगु धकाः पिहांवःगु सहमतियात एकीकृत नेकपा माओवादीया क्रान्तिकारी समूह वैद्य समूहपाखें म्हिगः अस्वीकार याःगु दु ।
प्यंगू शीर्ष दलत एकीकृत नेकपा माओवादी, नेपाली कांग्रेस, एमाले व मधेशी मोर्चां विवादित विषयलय् सहमति यायेधुंकल धाःसां – अन्ततः व पार्टीया पूर्वीय अडानया विपरित जूगु धाःगु दु ।

प्यंगू दलया प्यम्ह शीर्ष नेतातय्सं सहमति याःगु झिंछगू प्रदेशय् सहमति जुल धकाः धाःसां यथार्थय् व पार्टीया पूर्व निर्णय कथं झिंप्यंगू हे जुइमाःगु धासें उगु सहमतियात क्रान्तिकारी वैद्य समूहं अस्वीकार याःगु दु । उगु खँ म्हिगः हे क्रान्तिकारी विचार समूह वैद्य समूहपाखें छगू प्रेस विज्ञप्ती पिकयाः उगु कथंया आपत्ति व विरोध याःगु खः ।
एकीकृत नेकपा माओवादीया वरिष्ठ न्वकु मोहन वैद्य किरण व मूछ्याञ्जे रामबहादुर थापा बादलं ल्हाःचिं तयाः पितब्यूगु उगु विज्ञप्तीकथं संसदवादी दलतय्सं पूर्ण संविधान पित मबिसे अपूर्ण संविधान पितबीगु षड्यन्त्र जुयाच्वंगु खँय् सर्वसाधारण जनताया ध्यान सालाः राज्य पुनर्संरचना उपसमिति व आयोगं यायेमाःगु ज्या मयाकुसे न्हापा हे न्ह्यःने हःगु सिद्धान्तयात नालाः झिंप्यंगू प्रदेशय् वनेमाःगु पार्टी व दलत थःपिनिगु स्वार्थ कथं ११ प्रदेशय् लिकुनाः आमजनताया इच्छा, आकांक्षा व आवश्यकतायात ध्याक्वय् वांछ्वःगु प्रष्ट दु ।

निर्वाचन प्रणालीया खँय् नं राज्यया हरेक अंगय् उत्पीडित जाति, क्षेत्र, लिङ्ग, वर्ग लगायतया समानुपातिक व समावेशीय प्रतिनिधित्व जुइमाः धासें विगतया सहमतिप्रति यथावत दुगु खँ नं उगु विज्ञप्तीइ न्ह्यःथनातःगु दु । एकीकृत नेकपा माओवादीया स्थायी समितिया बैठक च्वनाः सहमतिया विषयवस्तुइ क्वःछ्यूगु धयातःसां यथार्थय् पार्टीया स्थायी समितिया बैठक मच्वंसे मात्रै प्रचण्ड–बाबुराम समूहया स्थायी समितिया जक बैठक च्वंगु व वैद्य समूहयात सुचं तक्क नं मब्यूगु विज्ञप्तीइ न्ह्यःथनातःगु खः ।
उकिं स्थायी समितिया बैठक च्वनाः पारित यानाः जक सहमति यात धयागु खँ पूर्ण रुपं भूmठ खः ।

थ्वहे दथुइ जेठ ११ गते निसें १४ गतेतक्क येँ लगायत देय्न्यंक जनप्रदर्शन यायेगु, जनआन्दोलन संघर्ष समिति पूर्व घोषित ज्याभ्mवः प्रति समर्थन व ऐक्यबद्धता प्वंकुसें मधेशी मोर्चा तयातःगु ज्याभ्mवः प्रति समर्थन व ऐक्यबद्धता प्वंकुसें आदिवासी जनजाति संघर्ष समितिं घोषणा याःगु संघर्षया ज्याभ्mवःत प्रति नं समर्थन व ऐक्यबद्धता प्वंकूगु दु ।