संविधानसभा भंग यानाः संसद्यात अधिकार बिइगु : प्रचण्ड पक्ष

येँ (झीगु स्वनिगः)

एकीकृत नेकपा (माओवादी)या नायः पुष्पकमल दाहाल प्रचण्ड पक्षं विवादित विषययात निर्णय यायेगु अधिकार व्यवस्थापिका संसदयात बियाः संविधानसभायात भंग यायेगु व जेठ १४ गते संविधानया प्रारम्भिक मस्यौदा हयेगु प्रस्ताव तःगु दु । एकीकृत माओवादीया प्रचण्ड पक्ष व न्वकु डा. बाबुराम भट्टराई पक्षया नेतात दुथ्याकाः च्वंगु स्थायी समितिया मुँज्यां प्रदेशतय्गु नां व सीमाया विषयात कयाः लिपा निर्णय यायेगु कथं संविधान जारी यायेफु धकाः निर्णय याःगु दु ।

आः हे फुक्क विषययात कयाः सहमति यायेगु खँय् बः बिइगु तर सहमति जुइ मफत धाःसा प्रष्ट रुपं विधीया व्यवस्था यानाः लिपा निर्णय यायेफै धकाः धयादीगु दु । उगु बैठक लिपा नेता दीनानाथ शर्मां धयादिल ‘छुं जुयाः याये मफत धाःसा छुं छुं विषययत कयाः संविधानय् हे प्रष्ट रुपं विधीया व्यवस्था यानाः लिपा निर्णय यायेगु कथं जेठ १४ दुने हे संविधान जारी यायेमाः ।’

एकीकृत माओवादीं पहिचान व सामथ्र्यताया आधारय् राज्य पुनर्संरचना यानाः प्रदेशत दयेकेमाः धकाः बः बिया वयाच्वंगु दु धयादिसें वय्कलं संविधानसभाया म्याद गुगु नं हालतय् थप यायेगु जुइमखु धकाः नं स्पष्ट यानादिल । वय्कलं धयादिल ‘संविधानसभाया म्याद थपबारे सहलह ला छु बिचाः तकं याये फैमखु ।’
थ्व हे दथुइ आः जेठ १४ गते तकया दुने संक्षिप्त संविधान जारी यायेत नं दलतय्गु दथुइ ११ प्रदेशय् सहमति ब्वलंकेगु नितिं कुतः यायेगु धकाः तकं निर्णय याःगु दु ।
प्रचण्ड व डा. बाबुराम पक्षधरया नेतातय्सं ब्वति कयादीगु स्थायी समितिया उगु मुँज्याय् भूगोलया आधारय् ११ प्रदेशय् हे सहमति यायेगु नितिं पार्टीपाखें प्रस्ताव यंकेगु धकाः निर्णय जूगु खँ नेता दीनानाथ शर्मां संचारकःमितय्त जानकारी बियादीगु दु ।
अथे एकीकृत माओवादीया स्थायी समितिं याःगु निर्णययात कयाः माओवादीया जातीय मोर्चातय्सं विरोध यातकी ज्यामछिंगु अवस्था वयेफु धकाः तयेकाः थःपिनिगु विचार समूहया जातीय संगठनया नेतातलिसे सहलह ब्याकेगु ज्या तकं म्हिगः सोमवाःनिसें हे न्ह्याकूगु दु ।

थ्व हे दथुइ जेठ १४या दुने पूर्ण संविधान हयेफैगु अवस्था मन्त धकाः दलतय्गु दथुइ विकल्पया बारे सहलह यायेगु ज्या तकं न्ह्याकूगु दु । लुमंकेबहःजू एकीकृत माओवादीया बरिष्ठ उपाध्यक्ष मोहन बैद्य किरण पक्षधर आःया अवस्थाय् पार्टीया आधिकारीक निर्णय धैगु पहिचान व सामथ्र्यताया आधारय् १४ प्रदेश हे खः धकाः न्ह्यथनाः सतकय् क्वहां वयाच्वंगु दुसा उगु विचार समूहया आदिवासी जनजाति नापं राज्यं बहिस्करणय् लाकातःपिं समुदायपाखें्र प्रतिनिधित्व यानाच्वंपिं नेता व कार्यकर्तात आदिवासी जनजातित नाप जानाः जातीय पहिचानया आधारय् राज्य पुनर्संरचना यानाः इलय् हे संविधान जारी यायेमाःगु माग यानाः जुयाच्वंगु आन्दोलनय् सक्रिय जुयाच्वंगु दु ।