७, ८, ९ बन्दया लागिं कडा तयारी

येँ (सन्ध्या टाइम्स)/थौं जेठ १ गते नेवाः लगायत आदिवासी जनजातिं घोषणा यानातःगु बन्द छु जुल धकाः म्हिगः आपालं मनूतय्त कौतुहल जुल। वास्तवय् नेवाः लगायत आदिवासी जनजातिं जेठ १, २ व ३ गते यायेगु धकाः न्हापा यानातःगु बन्दया घोषणा लित कयाः उकिया पलेसा जेठ ७, ८ व ९ गते बन्द यायेगु मेगु घोषणा यायेधुंकूगु दु। उकिं थौं बन्द मदु।

जेठ ७, ८ व ९ गते जुइगु बन्दया लागिं नेवाः लगायत आदिवासी जनजातितय्सं कडा रुपं तयारी याःगु दु। उगु बन्द न्ह्यः नेवाःतय्सं येँया खुलामञ्चय् जेठ ६ गते छगू तःजिगु सभा याइगु ग्वसाः दु। वकुन्हु हे जनजातितय्सं रिंगरोड घेराउ याइ। ६ गतेया ज्याझ्वः प्रयार यायेगु लागिं ३ गते स्वनिगलय् सिठ्ठी पुयाः जुलुस पिकायेगु ज्याझ्वः दयेकूगु दु।

जेठ ७, ८ व ९ गते आदिवासी जनजाति संयुक्त संघर्ष समितिं बन्दया आह्वान याःगु खःसा उगु बन्दयात मधेसी संयुक्त मोर्चां नं सक्रिय समर्थन यायेगु निर्णय याःगु दु। बन्दयात साथ बीगु लागिं मोर्चां जेठ ५ व ६ गते मधेस बन्दया घोषणा याःगु दु। लिसें ६ गते कुन्हु रिंगरोड घेरे यायेगु दिनय् मधेसी मोर्चां बल्खुइ छगू तःधंगु सभा यायेगु नं ज्याझ्वः दयेकूगु दु।

ज्याझ्वः ताःलाकेगु लागिं नेवाः स्वायत्त राज्य मंकाः संघर्ष दुने दुथ्याःगु नेवाःतय् झिगू घटकपाखें म्हतिं ५०/५० म्ह ल्याय्म्ह तयाः छगू नेवाः ल्याय्म्ह दस्ता नीस्वनेगु निर्णय नं याःगु दु। उगु ल्याय्म्ह दस्तापाखें जेठ ४ गते येँय् मार्चपास यानाः प्रदर्शन यायेगु खँ धाःगु दु। लिसें बन्द व सभाया प्रचार यायेत ५ गते बसन्तपुलिं छगू मोटरसाइकल र्‍याली नं पिकायेत्यंगु दु। उगु र्‍यालीइ यलं द्वःछिगः व नेवाः राष्ट्रिय मुक्ति मोर्चापाखें द्वःछिगः मोटरसाइकलं ब्वति कायेगु खँ धाःगु दु। ज्यापु महागुथिं व पश्चिम लागा नेवाः पुचःया ग्वसालय् म्हिगः जूगु बैठकं वकुन्हु थानकोटं बिस्कं हे मोटरसाइकल र्‍याली पिकयाः बसन्तपुली मुनेगु निर्णय याःगु दु। ज्यापु महागुथिपाखें बोसिगां, चित्लाङ, नगदेश आदि लागाय् प्रचार प्रसार व कोठे भेला यायेगु ज्या यानाच्वंगु दु।गांगामय् माइकिङ्गया ज्या नं यानाच्वंगु दु।