‘जनसेना बुझेयाये धुंकाः संघीयताय् समस्या’

पहिचानया आधारय् प्रदेशया नितिं सतकय् क्वहां वयेमाःगु अवस्था वल: प्रचण्ड

येँ (झीगु स्वनिगः)

एकीकृत नेकपा (माओवादी)या नायः पुष्पकमल दाहाल प्रचण्डं जनमुक्ति सेना बुझेयाये धुंकाः अःपुक पहिचानया आधारय् राज्य पुनर्संरचना जुइ धकाः आशा यानागु तर झन झन हे घेराबन्दी यानाहल धकाः धयादीगु दु । म्हिगः आइतवाः आदिवासी जनजातिया न्ह्यलुवाःतय्सं प्रचण्डया निवास लाजिम्पाटय् डेलिगेशन वंगु इलय् वय्कलं अथे धयादीगु खः । आदिवासी जनजाति नापं राज्यं बहिस्करणय् लाकातःपिं समुदायया माग कथं पहिचानया आधारय् राज्य पुनर्संरचना यायेगु नितिं थःम्हेस्यां भूमिका म्हिताः च्वनागु तर कांग्रेस व एमालेपाखें उकिया पंगः जुयाच्वंगु दु धयादिसें आः थः याकःचां जक यानाः पहिचानया आधारय् राज्य पुनर्संरचना यायेफैगु अवस्था मवःगुलिं आदिवासी जनजातित सतकय् क्वहां वयेमाल धकाः नं नायः प्रचण्डं इनाप यानादीगु दु ।

उगु इलय् एकीकृत नेवाः राष्ट्रिय मुक्ति मोर्चा नेपाःपाखें जातीय पहिचानया आधारय् राज्य पुनर्संरचना यानाः नेवाः राज्ययात सुनिश्चित यायेमाःगु, जेठ १४ गतेया दुने न्हूगु संविधान जारी याये हे माःगु माग तयाः प्रचण्डयात ज्ञापन पौ तकं लःल्हाःगु खः । उगु ज्ञापन पतिइ नायः पवनमान श्रेष्ठ व मूछ्याञ्जे देवेन्द्र श्रेष्ठं ल्हाःचिं तयादीगु खःसा दांभरी शिव श्रेठं लःल्हानादीगु खः । अथे हे आदिवासी जनजातिय्गु नेतृत्व नेपाली कांग्रेसया सभापति सुशील कोइरालाया निवास महाराजगञ्जय् नं डेलिगेशन वंगु खः ।
उगु इलय् कांग्रेसया सभापति कोइरालां जातीय पहिचानया आधारय् राज्य पुनर्संरचना यायेगु पक्षय् थःपिं मदु धकाः धयादीगु इलय् जनजाति नेतातय्सं अथे खःसा आः कांग्रेस जनजाति विहिन खय् ब्रम्हुतय्गु जक दल जुइ धकाः ख्याच्वः बियादीगु खः ।
उग्रिमय् हे आदिवासी जनजातिय्सं जातीय पहिचानया आधारय् राज्य पुनर्संरचना यायेमाःगु, इलय् हे संविधान जारी यायेमाःगु माग यानाः नारावाजी तकं याःगु खः । नेता कोइरालायात नं नेवाः मोर्चां उगु हे कथंया ज्ञापन पौ लःल्हाःगु खः ।