‘नेतातपाखें हाकनं मेगु षडयन्त्र’

जनताया मागया अःखः संविधानसभायात निष्किृय यानाच्वन : बैद्य

येँ (झीगु स्वनिगः)

एकीकृत नेकपा (माओवादी)या वरिष्ठ न्वकु मोहन वैद्य किरणं संविधान निर्माणया झ्वलय् खनेदुगु विवादित विषययात संविधानसभाय् यंकाः निर्णय यायेगु मयासे हाकनं संविधानसभाया संवैधानिक समिति अन्तर्गतया विवाद समाधान उपसमितिइ यंकाः शीर्ष नेतातय्सं न्हूगु कथं मेगु कथंया षडयन्त्रयात धकाः धयादीगु दु । जनमतया मतयात कदर यायेगु जुइ धयाच्वंपि नेतातय्सं हे संविधानसभायात निष्किृय यानाः जनमतया मागयात उपेक्षा यानाच्वन धकाः नं माओवादीया बरिष्ठ नेता वैद्यं धयादिल ।

प्रगतिशील साहित्यकार नापं समालोचक डा. ऋषिराज वरालं च्वयादीगु ‘नेपाली जनयुद्ध’ नांगु सफूया विमोचन ज्याझ्लय् नेता वैद्यं म्हिगः येँय् जूगु ज्याझ्वलय् न्वंवासें राज्य पूर्नसंरचनाया सवालय् १४ प्रदेशयात त्वःताः माओवादीें आः न्हूगु कथं राज्य पुनर्संरचनाया प्रस्ताव न्ह्यःने हल धकाः यानाच्वंगु फुक्कं कथंया प्रचार गलत खः धकाः स्पष्ट यानादिल । माओवादीया बरिष्ठ नेता वैद्यं थःगु हे पार्टीया नायः पुष्पकमल दाहाल प्रचण्डं नेपालया कम्युनिष्ट आन्दोलनयात जालझेलपूर्ण शब्दजालय् म्हिताः विर्सजन याकल धकाः नं धयादिल ।

वय्कलं साम्राज्यवादी नापं विस्तारवादीतय्सं थें हे जालझेल यानाः पार्टीया नायः प्रचण्डं नेपालया कम्युनिष्ट आन्दोलनयात परम्परावादी ढंगं विर्सजन यानाच्वन धकाः स्पष्ट यानादिल । वय्कलं माओवादी पार्टीया मूल नेतृत्व पक्षं साम्राज्यवाद व विस्तारवादीत नाप ल्वायेगु त्वःताः आः वनाच्वंगु विचार न्हुगु माक्र्सवाद, नव उत्तर माक्र्सवादपाखें प्रेरित जुयाच्वंगु दु धकाः धयादिल ।

माओवादीया बरिष्ठ नेता बैद्यं पार्टी नेतृत्वं माक्र्सवादया नामय् माक्र्सवादया हे विरुद्ध ब्यवहार प्रदर्शन यायेगु ज्या जुयाच्वंगु दु धकाः द्वपं बियादिल । वय्कलं वाग्मति खुसिइ च्वनाच्वंपिं सुकुम्वासीतय्त पञ्चायतकालीन शैलीइ सरकारं चीकेगु ज्या यात धकाः न्ह्यथसें विरोध यानादिल । ज्याझ्वलय् माओवादीया छ्याञ्जे सिपि गजुरेलं आःया षडयन्त्रमुलक कथं संविधान निर्माण यायेगु कुतः यानाच्वंगु दु धकाः धयादिल । गजुरेलं संविधानसभाया सभासदतय्त बेकम्वा यानाः प्यंगू दलया ठालुतय्सं जक संविधान निर्माणया ज्या यानाच्वंगुलिं जनताया पक्षय् संविधान निर्माण जुइ फैमखु धकाः ठोकुवा यानादिल ।

आः दलतय्गु मुँज्याय् सुना नं दयेकूगु संविधानयात गुगु कथं घोषणा याइगु धकाः जक नेतातय् दथुइ विवाद जुयाच्वंगु दु धकाः धयादिल । वय्कलं उत्पीडित वर्ग, क्षेत्र लिङग र जातिया हक अधिकार न्हूगु संविधानय् सम्वोधन मजुल धाःसा उकियात थःपिन्सं स्वीकार यायेगु जुइमखु धकाः नं स्पष्ट यानादिल । विमोचित जूगु सफूयात कयाः एकीकृत माओवादी केन्द्रिय सदस्य सुर्यप्रकास सुवेदी पथिकं समीक्षा यानादीगु खः ।