बन्द आह्वानकर्ता खय् ब्रम्हुतपाखें ‘तमुवान राज्य’या बोर्ड लिकायेवं ल्वापु

येँ (झीगु स्वनिगः)

न्हूगु संविधानय् जातीय पहिचानया आधारय् राज्य पुनर्संरचनाय विरोध यानाः बन्द आह्वान याःपिं खय् ब्रम्हुतय्सं पोखराया पृथ्वी चोकय् ‘तमुवान राज्य’ धकाः च्वयातःगु बोर्ड लिकायेवं स्थानीय आदिवासी जनजाति व बन्दकर्तातय् दथुइ ल्वापु जूगु दु ।
उगु ल्वापुइ लानाः निम्ह बन्द आह्वानकर्तात घाःपाः तकं जूगु दु । प्रहरीं ल्वापुयात नियन्त्रणय् कायेगु नितिं च्यागू राउण्ड अश्रुग्यास तकं प्रहार याःगु खः । अथे ल्वापु जुइवं स्थानीयवासीं उगु लागाय् बन्दया विरुद्ध प्रतिकार तकं याःगु खः ।

अथे हे छुं दिं न्ह्यः जक खय् ब्रम्हुतय्सं नेपाःया न्हापांम्ह सहीद कथं नालातःम्ह लखन थापाया सालिक तकं चीकेगु कुतः याःगु इलय् खय् ब्रम्हुत व पोखराया आदिवासी जनजातितय्गु दथुइ ल्वापु जूगु खः । उगु घटनायात कयाः नेपाल आदिवासी जनजाति महासंघया मूछ्याञ्जे आङकाजी शेर्पां घोर भत्र्सना याःगु दु । नेपाःया न्हापांम्ह सहिद लखन थापाया साहिद तोडफोड यायेत्यंगु धैगु सहिद नापं जनजातियात तःधंगु अपमान यायेगु कुतः याःगु खः धकाः नं धयादिल ।

ब्रम्हु, क्षत्री, ठकुरी, दसनामी नामं चायेकातःगु थीथी संगठनतपाखें बन्द आह्वान याःगु खःसा इमिसं हे तमुवान राज्य धकाः च्वयातःगु साइनबोर्ड चीकेगु ज्या याःगु खःसा सहिद लखन थापाया सालिक तकं चीकेगु कुतः याःगु खः ।