नेवाः राज्य दुगु संविधान मवल धाःसा च्याकेगु ख्याच्वः

नेवाः राज्यया नितिं न्ह्याः वनेगु प्रतिबद्धता

येँ (झीगु स्वनिगः)

नेवाः स्वायत्त राज्यया नितिं आन्दोलन यानाः वयाच्वंपिं नेवाः कार्यकर्तातय्सं नेवाः राज्य मदुगु संविधान जारी यात धाःसा अज्वःगु संविधान च्याकेत तयार दु धकाः धयादीगु दु । जेठ १४ गते नेवाः स्वायत्त राज्य मदुगु संविधान जारी यात धाःसा किपू व यलया नेवाःतय्सं अज्वःगु संविधान च्याकेत तयार दु धकाः म्हिगः बुधवाः जूगु ज्याझ्वलय् न्वंवानादीगु खः ।

अथे नेवाः कार्यकर्तातय्सं न्वंवानादी धुंकाः नेवाः आन्दोलनया नेतृत्व यानाच्वंपिं नापं नेवाः सभासद्तय्सं नेवाः राज्यया नितिं न्ह्याः वनेत तयार दु धकाः प्रतिबद्धता प्वंकादीगु खः । नेवाः स्वायत्त राज्य मंकाः संघर्ष समितिया ग्वसालय् जूगु उगु ज्याझ्वलय् एकीकृत माओवादीया सभासद् दिलिप महर्जनं नेवाः स्वायत्त राज्ययात स्वीकार मयात धाःसा माओवादीइ च्वनाः न्ववायेगुया अर्थ मदु धकाः धयादिल ।

अथे हे एमालेया सभासद् डा. मंगलसिद्धि मानन्धरं संविधानसभाय् नेवाः राज्यया पक्षय् पार्टीं भूमिका म्हितेगु ज्या मयाःसां थः धाःसा संविधानसभाय् नेवाः राज्यया पक्षय् हे दनेगु जुइ धकाः धयादिल । उगु हे कथं नेपाली कांग्रेसया सभासद् तिर्थराम डंगोलं नं नेवाः स्वायत्त राज्यया नितिं सकलें छप्पँ जुयाः न्ह्याः वनेमाः धकाः धयादिल । अथे हे कांग्रेसया सभासद् ध्यानगोविन्द रञ्जीतं थः नं नेवाःत नाप नापं हे दुगु नापं जेठ ६ गते जुइगु नेवाःतय्गु शक्ति प्रदर्शनय् वयेगु जुइ धकाः बचं बियादिल ।

सभासद् भिक्षु आनन्दं नेवाः नेतृत्व गां गामय् वनाः अभियान न्ह्याकेमाः धकाः बः बियादिल । अथे हे एमालेया नेपाः लोकतान्त्रिक नेवाः संघया केवि घःजुं एमालें नेवाः राज्ययात स्वीकार मयात धाःसा पार्टीइ त्वःताः वयेत थःपिं तयार दु धकाः धयादिल ।
एकीकृत नेवाः राष्ट्रिय मुक्ति मोर्चाया नेपाःया धनबहादुर महर्जन, बदन शर्मा, उमेश स्थापित, गजेन्द्र मानन्धर लगायतपिन्सं नेवाः स्वायत्त राज्यया नितिं आन्दोलन सशक्त कथं यायेमाः धकाः बः बियादिल ।

अथे हे ज्यापु समाज यलया मंगल महर्जन, नेवाः स्वायत्त राज्य मंकाः परिषद् किपूया पञ्चलाल महर्जन, शैलेश शाक्य बरे, धर्म मुनिकार लगायतया नेवाः नेता व कार्यकर्तातय्सं नेवाः राज्यया नितिं राजनीतिक दलया नेवाःत छप्पँ जुयाः वनेमाःगु अले कन्हय् वनाः नेवाः राज्य मदुगु संविधान जारी यात धाःसा पार्टी त्वःताः वयेत तयार जुइमाःगु नापं अज्वःगु संविधान च्याकेत तकं तयार जुइमाः धकाः बः बियादीगु खः ।
संघर्ष समितिया नायः बाबुराज बज्राचार्यया सभापतित्वय् जूगु उगु ज्याझ्वलय् संघर्ष समितिया सचिवालय कजि मल्ल के सुन्दरं जेठ ६ गते नेवाः शक्ति प्रदर्शन यायेगु, ५ गते मोटरसाइकल ¥याली यायेगु नापं नेवाःतय्तगु आन्दोलनयात समर्थन यानाः उखुन्हु चक्रपथ चाकःहिइक च्वनाः सभा याइ धकाः जानकारी बियादीगु दु ।