‘संकटकाल लागू यायेवं जनविद्रोह’

सभामुखं जिम्मेवारी कायेमाः यादव

येँ (झीगु स्वनिगः)

मधेसी जनअधिकार फोरम नेपालया नायः उपेन्द्र यादवं संकटकाल लागू यानाः संविधानसभाया म्याद थपयात धाःसा जनविद्रोह यायेगु जुइ धकाः ख्याच्वः बियादीगु दु । स्वंंगू प्रमुख दल एकीकृत माओवादी, नेपाली कांग्रेस व एमालेया शीर्ष नेतातय्सं संकटकाल लागू यानाः संविधानसभाया म्याद हाकनं खुला थप यायेगु षडयन्त्र यानाच्वंगु खुलासा यानादिसें नेता यादवं अथे ख्याच्वः बियादीगु खः । वय्कलं धयादिल ‘जिपिं अज्वःगु सहमति गुगु नं हालतय् स्वीकार यायेगु जुइमखु अथे जुल धाःसा जनविद्रोहलय् वनेगु जुइ ।’

म्हिगः बुधवाः रिपोर्टर्स क्लब नेपालया साक्षात्कार ज्याझ्वलय् यादवं आः उकियात थःपिनिगु दलं गुगु नं हालतय् स्वीकार यायेफैमखु धकाः न्ह्यथसें धयादिल ‘कांग्रेस, माओवादी व एमालेया प्रमुख नेतातय्सं संकटकाल लागू यानाः खुला म्याद थप यायेगु गोप्य सहमति याःगु दु । जेठ १४ गते संविधान जेठ १४ गते संविधान मवल धाःसा मधेस नापं देय्न्यंकं हे जनविद्रोह यायेगु जुइ ।’

वृहत्त मधेसी मोर्चां आन्दोलन न्ह्यब्वाकेगु झ्वलय् जेठ २, ५ व ६ गते मधेस बन्द यायेगु घोषणा यानागु दु धयादिसें वय्कलं वर्तमान सरकारय् थःगु दल गुगु नं हालतय् वनीमखु धकाः धयादिल । अथे हे नेता यादवं धयादिल ‘थ्व बाबुरामया बहुमतया सरकार खः, राष्ट्रिय सहमतिया सरकार मखु । मधेसय् आः स्वंगू दलया मतियार जूपिं मधेसी मोर्चाया विरुद्ध नं आन्दोलन जुइ । मधेसयात नां कयाः सत्ताय् वनीपिन्त आः जनतां त्वःती मखु ।’

नापं वय्कलं संविधान दयेके मफुगुया मुख्य दोषी संविधानसभाया नायः अर्थात सभामुख खः धकाः तकं द्वपं बियादिल । मधेसी जनअधिकार फोरमया नायः यादवं धयादिल ‘संविधानसभाया बैठक हे मच्वंसे संविधानसभायात निस्तेज यायेगु गैर जिम्मेवारी ज्या सभामुखपाखें जुयाच्वंगु दु ।’ वय्कलं धयादिल ‘उकिया जिम्मेवारी सभामुखं कायेमाः ।’ यादवं संविधानसभा स्वंगू दलया प्रमुख नेतातय्गु कठपुतली जूगु द्वपं बियादिसें संविधान सभा व स्वंगू दलया शीर्ष नेतात मिलेजुयाः संविधान दयेकगु चाहाना यानाच्वंगु मदु धयादिल ।

फोरमया नेता यादवं संविधान निर्माणया विषययात संविधान सभाया बैठक सभामुखं मसःतूगु, संवैधानिक समितिया सभापतिं नं बैठक सःतेगु मयाःगुलिं ततःधंगु स्वंगू दलया नेतात मिलेजुयाच्वंगु दु, थ्व धैगु नेपाः देश, दुनिया व सञ्चारमाध्यमयात झंगःलाःगु खः धकाः नं द्वपं बियादिल ।