भारतं पेशेवार अपराधीत स्वनिगलय् दुहां वल

सनिलय् ६ बजे हे लु“ पसः तिइत निर्देशन

येँ (झीगु स्वनिगः)

‘थौंकन्हय् लुँ वहः पसःया सतर १५ निसें २० मिनेटया दुने तछ्यानाः लुँ खुयाः यंकेफुपिं ग्यानपुसेच्वंपिं भारतया खुँत स्वनिगलय् वयाच्वंगु दु ।’ थ्व सुचं मेपिन्सं मखु लुँ वहः पसःतय्गु मंकाः संगठन नेपाल सुनचाँदी व्यवसायी संघं ब्यूगु खः ।
प्रत्यक लुँ वहः पसलय् सूचं बियाः तसकं सतर्क जुइत तकं इनाप यानातःगु दु । थौंकन्हय् बहनी ७ बजे तक हे द्यः तुइसे च्वंगु ई खःसा थ्व इलय् हे सनिलय् ६ बजेनिसें हे लुँ वहः पसः बन्द यायेत अथे इनाप याःगुलिं लुँ वहः पसःया व्यापारितय्त समस्या ब्वलंगु दु ।

बैशाख २५ गतेया मिति तयाः सुनचाँदी व्यवसायी संघं पितब्यूगु उगु पतिइ धयातःगु दु ‘प्रहरी परिसर अपराध अनुसन्धान शाखापाखें वःगु जानकारी कथं आःया अवस्थाय् देशय् संविधान दयेकेगु ई लिक्क वयाच्वंगु व देय्या थ्व हे ईयात मौका तायेकाः भारतया पेशेवर अपराधिक क्रियाकलाप, खुइगु व डकैती याइपिनिगु पुचः नेपालय् वःगु जानकारी जूगु दु । इपिं पेशेवर अपारधीतय्सं लुँ पसःयात हे ताः क्यंगु व इमिसं थुलि याकनं खुइ फु कि पसःया सतर तछ्यानाः १५ निसें २० मिनेट तकया दुने हे पसःया फुक्क सामानत खुयाः बेपत्ता जुइफुगु जानकारी वःगु दु । पसः संचालन यायेगु इलय् सतर्कता नालेमाःगु व ज्या यायेगु झ्वलय् सुंनं न्हूम्ह मनूत व भारतीय मनूत पसलय् वल धाःसा अप्वः ध्यान बिइमाः । नापं थ्व ईयात ध्यानय् तयाः बहनी ६ बजे लिपा हे पसः बन्द यायेमाःगु, पसलय् एलार्म सिस्टम व सि.सि.टि.भी अनिर्वाय रुपं तयेमाःगु, पसःया खापा तसकं बाःलाःगु व ताःचाः नं बांलाःगु ब्रायण्डया तयेत व पसः सुरक्षा यायेमाः । छुं घटना हे जुल धाःसा प्रहरीपाखें सुरक्षा बिइगु ला द हे दु तर व सिबें न्ह्यः हे थः सतर्क जुयाः ज्या यायेगु झ्वलय् अपराधिक क्रियाकलापपाखें बचे जुइफइ ।’

थ्व हे झ्वलय् जनसेवाया इन्सपेक्टर हेम थापां झीगु स्वनिगः न्हिपौलिसे खँल्हासें थःम्हं नं भारतया मोतिहारीपाखें छगू अपराधिक पुचः वःगु धकाः थःपिन्त नं सुचं वःगु खँ कनादिल । उकिया नितिं म्हिगः मंगलवाःनिसें हे माःगु कथं सुरक्षाकर्मीत परिचालन याये धुनागु दु धकाः नं जानकारी ब्यूगु दु । थ्व हे झ्वलय् लुँ वहः पसः तयाच्वंम्ह निरञ्जनरत्न शाक्यं झीगु स्वनिगःलिसे खँल्हासें सुनचाँदी व्यवासायी संघं गुगु कथं पसः पसलय् सुचं ब्यूगुयात कयाः बास्तवय् अज्वःगु पौ पसः तयाच्वंपिन्त मब्यूसे दुने दुने हे सुरक्षाया नितिं माःगु कथं भूमिका म्हितेमाःगु व सुरक्षाकर्मीत परिचालन यायेमाःगु खः ।

अथे हे लुँ वहः व्यापारीतय्सं ७ बजे तक हे तुइसे च्वनीगु अवस्थाय् ६ बजे हे पसः तिइमाःगु अले सुरक्षाया व्यवस्थाया नितिं थःपिन्सं हे भूमिका म्हितेमाःगु धकाः गुगु कथं सूचं वल उकिं यानाः व्यापार यानाः नयेत थाकुइगु अवस्था वल धकाः धयादीगु दु । अथे हे सुनचाँदी व्यवसायी संघं अथे सूचं वयेवं आः पसः चायेकेत तकं ग्याये मालीगु अवस्था ब्वलंगुलिं थज्वःगु इलय् राज्यं छु स्वयाच्वन धकाः अथे व्यापारितय्सं न्ह्यसः थनाहःगु दु ।