जनजातितपाखें पहिचानया आधारय् राज्य पुनर्संरचनाया माग

स्वन्हु आमहड्तालया घोषणा

येँ (झीगु स्वनिगः)

पहिचानया आधारय् राज्य पुनर्सरचना यायेमाःगु नापं जेठ १४ गते हे न्हूगु संविधान जारी यायेमाःगु माग यानाः आदिवासी जनजातिय्तगु मंकाःगु मोर्चा आदिवासी जनजाति संयुक्त संघर्ष समितिं वइगु जेठ ७, ८ व ९ गते लगातार स्वन्हु तक देय्न्यंकं आमहड्तालया आह्वान याःगु दु ।

आम हड्तालया झ्वलय् शैक्षिक संस्था, यातायात, कलकारखाना, बजाः पूर्ण रुपं बन्द जुइ धकाः उगु संघर्ष समितिं धाःगु दु । म्हिगः मंगलवाः यलया अक्षश्वर महाविहारय् च्वंगु आदिवासी जनजाति संयुक्त संघर्ष समितिया मुँज्यां उगु कथं निर्णय याःगु खः ।
अथे हे जेठ १० गतेनिसें संविधान जारी याइगु अन्तिम दिन १४ गते तक हे न्हिया न्हिथं न्हूबानेश्वरया संविधानसभा भवन पिने धर्ना च्वनेगु धकाः तकं निर्णय याःगु दु ।
लिपांगु इलय् संघीयताविरोधतय्सं थीथी कथंया लागायात अखण्ड जुइमाः धकाः माग यानाः सतकय् क्वहां वयाच्वंगु अवस्थाय् पहिचानया आधारय् राज्य पुनर्संरचना यायेमाः धाइपिं पक्षधरत सतकं तापानाच्वंगु अले संघीयता विरोधीतय्गु हे खँ बय् बय् जुयाच्वंगुयात ध्यानय् तयाः आदिवासी जनजातिय्गु मंकाःगु मोर्चा उगु संघर्ष समितिं अथे आमहड्तालया आह्वान याःगु खः ।

आम हड्ताल ताःलाकेगु नितिं पर्चा पिकायेगु, वालपेन्टिङ यायेगु, माइकिङ यायेगु नं ज्या जुइ धाःगु दु । उगु संघर्ष समितिइ नेपाल आदिवासी जनजाति महासंघ, आदिवासी जनजाति सभासद् दबाव समुह ककस, आदिवासी जनजाति क्षेत्रीय महासंघ, नेवाः स्वायत्त राज्य मंकाः संघर्ष समिति, एकीकृत नेवाः राष्ट्रिय मुक्ति मोर्चा, नेपाल लोकतान्त्रिक संघनिसें थीथी जनजातिया संघ संगठनंनिसें मंकाः कथं दयेकातःगु संघर्ष समिति तकं दुथ्यानाच्वंगु दु ।

थ्व हे झ्वलय् नेपाःया आदिवासी जनजातिय्गु मंकाःगु संगठन नेपाल आदिवासी जनजाति महासंघं पहिचानया आधारय् राज्य पुनर्संरचना यायेमाःगु नापं इलय् हे न्हूगु संविधान जारी यायेमाःगु माग यानाः वइगु जेठ १ गतेनिसें ३ गते तक यायेगु धयातःगु नेपाल बन्दयात लितकाःगु दु । छगू हे मुद्धायात कयाः मंकाः कथं आदिवासी जनजाति संयुक्त संघर्ष समितिं अथे स्वन्हुयंकंया आमहड्ताल याःगुलिं जनजाति महासंघंपाखें अथे न्हापा घोषणा यानातःगु नेपाल बन्द ज्याझ्वःयात लितकाःगु खः ।