मन्त्रालय इनेथाय् नं ल्वापु
गृह अर्थ व जलश्रोतय् फुकस्यां दावी
यें (सन्ध्या टाइम्स) / न्हूगु सरकारय् सुयात छु छु मन्त्रालय बीगु धइगु खँयात कयाः एमाले व कांग्रेस दथुइ नं कचवं ब्वलंगु दु । एमालें थःत अर्थ जलस्रोत व संचार लिसें शान्ति तथा पुन- र्स्थापना मन्त्रालय नं माः धकाः दावी यानाच्वंगु दुसा कांग्रेसं नं अर्थ जलस्रोत व संचारय् दावी यानाच्वंगु दु । थुकिं यानाः मन्त्रालय बाँडफाँडया ज्या नं थातिं लानाच्वंगु दु । थ्व बारे सहलह यायेत थौं प्रधानमन्त्री माधव नेपालं कांग्रेस सभापति गिरिजाप्रसाद कोइरालालिसे खँल्हाबल्हा यानादीगु
दु । तर उगु खँल्हाबल्हां लिच्वः धाःसा पिहां मवः । अथे खःसां थौं बहनी तक मन्त्रिमण्डलय् वनीपिनि नां धाःसा तयार यायेगु सहमति जूगु दु ।
उखे मन्त्रिपरिषद् विस्तार यायेत थौं च्वंगु कांग्रेस व एमालेया बैठक नं छुं निर्णय मयासे क्वचाल । कांग्रेस सभापति कोइरालाया छेँय् उगु बैठक च्वंगु खः । बैठक थौं न्हिनय् हाकनं च्वनी तिनि ।
उखे मन्त्रालय कायेगु खँयात कयाः एमाले दुने नं विवाद तच्वःगु दु । माधव नेपाल व केपी ओलीं अर्थमन्त्री सुरेन्द्र पाण्डेया थासय् शंकर पोखरेलयात छ्वयेगु धकाः प्रस्ताव याःगु दुसा अध्यक्ष झलनाथ खनालं पाण्डेयात चीके मजिउ धकाः अडान कयाच्वंगु दु ।
अथे हे प्रधानमन्त्री नेपालं भिम रावलयात गृहमन्त्रीया निंतिं नां प्रस्तावित याःगु दुसा रावल बारे अध्यक्ष खनाल व ओली निम्हं असहमत जुयाच्वंगु दु । ओलीं गृहय् विद्या भण्डारीयात हयेमाः धकाः सुझाव बियाच्वंगु दु ।
थ्वहे झ्वलय् थौं एमाले स्थायी समितिया बैठक च्वनेत्यंगु दु । बैठकं सरकारय् वनीपिं मन्त्रीतय् नां तयार यायेगु लिसें कांग्रेसं फ्वनाच्वंगु मन्त्रालय बारे नं सहलह याइगु खँ दु ।
सरकारय् वःगु हे कारणं मधेशी जनअधिकार फोरम कुचा जूगु दुसा बछि हे कुचा जूसां नं विजय गच्छदारं न्हापा बी धाःगु मन्त्रालयत धाःसा पूरा हे माः धकाः दावी यानाच्वंगु दु । गच्छदारया दावी गृह जलश्रोत आदि मन्त्रालयय् दु ।
