नेवाः स्वायत्त राज्यया नितिं नेवाःतय्गु निगू शक्ति प्रदर्शन
जेठ ६ गते नेवाः शक्ति प्रदर्शन
येँ (झीगु स्वनिगः)
नेवाः स्वायत्त राज्यया नितिं संघर्ष यानाः वयाच्वंगु नेवाः स्वायत्त राज्य मंकाः संघर्ष समितिं वइगु जेठ ६ गते नेवाः शक्ति प्रदर्शन याइगु जूगु दु । मंकाः संघर्ष समितिं येँया खुल्लामञ्च चक्कं दबुलिइ तःधंगु सभा यानाः अथे शक्ति प्रदर्शन यायेत्यंगु खः । नेवाःतय्गु मंकाःगु मोर्चा नेवाः स्वायत्त राज्य मंकाः संघर्ष समितिया छुं दिं न्ह्यः जक च्वंगु मुँज्यां अथे निर्णय याःगु खः ।
उकिया तयारी कथं थौं मंगलवाः यलय् तःजकि नेवाःतय्गु भेला याइगु जूगु दु । अक्षश्वर महाविहारय् तःजिक भेला यानाः नेवाः स्वायत्त राज्य मंकाः संघर्ष समिति यलया परिषद् दयेकेगु तयारी याःगु दु । उकिया नितिं यलय् क्रियाशिल जुयाच्वंगु नेवाः खलः पुचःया प्रतिनिधितय्त सःताः तःजिक भेला यायेत्यंगु दु । अथे हे कन्हय् बुधवाः नेवाः स्वायत्त राज्य मंकाः संघर्ष समितिं येँय् तःजिक भेला याइगु जूगु दु ।
अथे हे जेठ ५ गते मोटरसाइकल र्याली यानाः प्रचार प्रशार याइगु जूगु दु । संविधान निर्माणया अन्तिम ई थ्यंगु अवस्थाय् नेवाः स्वायत्त राज्यया सुनिश्चितताया नितिं नेवाःतय्सं दलया नेता नापं संविधानसभाया दबाब बिइमाःगु जुयाः अथे नेवाःत सतकय् क्वकयाः शक्ति प्रदर्शन यायेत्यंगु खः ।
उकिया नितिं माःगु कथंया थीथी तयारी कन्हय् जुइगु भेलां तयार याइ धकाः धाःगु दु । अथे हे मंकाः संघर्ष समितिइ दुथ्याःगु थीथी कथंया झिंछगू घटकपाखें नं थःथःगु ज्याझ्वः यानाः अथे नेवाः शक्ति प्रदर्शनया नितिं तयारी याइ धाःगु दु । नेवाःतय्गु उगु शक्ति प्रदर्शनया नितिं आदिवासी जनजातितय्सं नं ग्वहालिया भूमिका म्हिती धाःगु दु ।
