जनताया ल्हाःचिं जेठ १ गते लःल्हाइगु
येँ (झीगु स्वनिगः)
एकीकृत नेकपा (माओवादी)या बरिष्ठ न्वकु मोहन वैद्य किरण विचार समूहपाखें राष्ट्रियता, जनपक्षीय संविधान, जनजीविकालगायतया विषययात कयाः जनताया ल्हाःचिं मुंकूगुयात वइगु जेठ १ गते संविधानसभाया नायः सुवासचन्द्र नेम्वाङयात लःल्हायेगु निर्णय याःगु दु ।
म्हिगः सोमबाः कुपण्डोलय् च्वंगु पार्टी नेवाः राज्य समितिया ज्याकुथिइ केन्द्रीय समितिया दुजःतय्गु मुँज्यां अथे संविधानसभाया नायः नेम्वाङयात छगू ज्याझ्वःया दथुइ लःल्हायेगु धकाः निर्णय याःगु खः । वंगु लच्छि न्ह्यवंनिसें शान्ति व संंविधान, राष्ट्रिय सहमतिया सरकार, राष्ट्रियता, जनजीविका व सम्मानजनक सेनासमायोजनया पक्षय् २२ बुँदाया माग यानाः थीथी १२ पार्टी व खलः पुचःत दुथ्याकाः राष्ट्रिय जनसङ्घर्ष समिति, नेपाल माओवादीया वैद्य पक्षं गठन याःगु खः ।
मुँज्याय् राष्ट्रिय सहमतिया सरकारया पक्षय् थःपिं दुगु व हाकनं प्यंगू बुँदाया सम्झौताया लिधंसाय् प्रधानमन्त्री जुयादीम्ह डा. बाबुराम भट्टराईयात प्रधानमन्त्रीइ हयेगु ज्या षड्यन्त्रपूर्ण जूगु व पार्टीया मूछ्याञ्जे रामबहादुर थापा ‘वादलं’ धयादीगु खः ।
राष्ट्रिय सहमतिया सरकार धाःसां नं विदेशी शक्तिया बलय् हाकनं भट्टराईयात हे पदस्थापन याःसां नं नेकपा (एमाले) सरकारय् मवंगुलिं हाकनं मेगु कथं सरकारयात संकट वःगु दु धकाः तकं मूछ्याञ्जे बादलं धयादीगु दु धकाः माओवादीया केन्द्रीय दुजः पवनमान श्रेष्ठं जानकारी बियादीगु दु । वय्कलं आः याकनं हे १२ दलसम्बद्ध संंघर्ष समितिया मुँज्या च्वनाः हाकनं मेगु कथंया सशक्त संघर्षया ज्याझ्वः पितहयेगु ज्या जुइ धकाः नं जानकारी बियादीगु दु ।
