विबाद तच्वइ धकाः बैठक स्थगित
येँ (झीगु स्वनिगः)
एकीकृत नेकपा (माओवादी)या नायः पुष्पकमल दाहाल प्रचण्ड व डा. बाबुराम भट्टराई पक्षया विचार समूहया म्हिगः सोमवाः च्वनेगु धयातःगु केन्द्रीय कमिटीया बैठकय् विवाद तच्वइगु अवस्था वयेवं स्थगित याःगु दु ।
पार्टीया नायः प्रचण्डया निवास जुयाच्वंगु लाजिम्पाटया छेँ, वर्तमान सरकारय् मन्त्रीत समावेशी मजूगु, मिसापिं दुमथ्याकूगु, स्वंगू दल नापं मधेसी मोर्चाया शीर्ष नेतातय्गु दथुइ चान्हय् याःगु न्यागू बुँदाया सहमतिया नितिं भारतया राजदूत जयन्तप्रसादलिसे सहलह ब्याकूगु, प्रचण्डया काय् प्रकाश दाहालया पुचःयात हिमाल गयेगु नितिं सरकारपाखें यक्व हे ध्यबा बिइगु कुतः याःगु धैगु बांमलाःगु नियत जूगु धकाः नेता व कार्यकर्तातय्सं विरोध यानाच्वंगु नापं माओवादीया जनमुक्ति सेनाया विरुद्ध नेपाली सेना परिचालन याःगु लगायतया खँ केन्द्रीय नेतातय्सं ल्ह्वनाः विवाद तच्वइगु अवस्था वइ धकाः अथे केन्द्रीय कमिटीया बैठक आकाझाकां स्थगित याःगु खः धकाः सूत्रं धाःगु दु ।
आः कन्हय् बुधवाः हाकनं बैठक च्वनेगु धकाः धाःसां कन्हय् नं च्वने फैगु संभावना तसकं म्हो जक दु धाःगु दु ।
सूत्रं ब्यूगु जानकारी कथं प्रचण्ड व बाबुराम पक्षया नेता व कार्यकर्तात लिपांगु इलय् वयाः नेतृत्वप्रति तसकं आलोचना यानाः वयाच्वंगुलिं नं पार्टी दुनेया निगू विचार समूह छगू हे यानाः केन्द्रीय कमिटीया बैठक च्वन धाःसा विवाद झन झन तच्वयाः नेतृत्वयात समस्या वयेफु धकाः तायेकाः आकाझाकां अथे बैठक स्थगित याःगु खः ।
