धी चिनाच्वंगु च्वापु नायाः वःगु खुसिबालं तःधंगु क्षति

१५ म्ह मंत, ५० बेपत्ता , हेलिकप्टर परिचालन

येँ (झीगु स्वनिगः)

म्हिगः शनिवाः कास्कीया माछापुच्छे« गाविसय् च्वंगु अन्नपूर्ण व माच्छापुच्छे« च्वापुगुँ जःखः धी चिनाच्वंगु च्वापु नायाः वःगु खुसिबालं तःधंगु क्षति यानाः ब्यूगु दु ।
च्वापु नायाः अनया सेती खुसिइ बाः वयाः झिंप्यम्हं मल्याक मनूत सीगु दुसा न्याय्म्हं मल्याक मनूत बेपत्ता जूगु दु ।

अथे खुसिबालं चुइकाहःगु अवस्थाय् स्वम्हेसित जीवत हे उद्धार याःगु दु । खुसिबा वयाः अन ता (पुल) व प्यंगः ट्रक तकं चुइकाः यंकूगु दु । अथे हे स्यांजापाखें गुँभ्वय्या नितिं हःगु बस नं चुइकाः यंकूगु दु ।
प्रत्यक्षदर्शी अष्टमान प्रधानाङं झीगु स्वनिगः न्हिपौलिसे खँल्हासें म्हिगः शनिवाः सुथय् थ्यंमथ्यं साढे ८ बजेपाखे अन्नपूर्ण व माच्छापुच्छे« च्वापुगुँ लागाया जःखः धी चिनाच्वंगु च्वापु आकाझाकां कुतुंवयाः अनया सेती खुसिइ लाःगु अले व हे खुसिबाः जुयाः वःगु खः । वय्कलं अनया तातोपानी बजारय् उगु इलय् छगू दर्जनं मल्याक मोटरसाइकल, निगः बस दुगु खःसा उगु सवारी साधन नापं अनच्वंगु स्वंगू होमस्टे व बजाः हे चुइकूगु दु ।

अथे घटनाजूगु इलय् उगु लागाय् न्यय्म्हं मल्याक मनूत दुगु नापं घटनाया झ्वलय् खुसिं चुइकाः यंकाः सिमाकचा ज्वनाः तकं बचेजूपिं मनूत दुसा थःगु नं मोटरसाइकल चुइकाः यंकूगु खः धकाः धयादिल । थः भच्चां जक ज्यान जोगेयायेत सफल जूगु नापं घटना जूगु इलय् तसकं सःवःगु खः धकाः नं धयादिल । वय्कःया धापू कथं आः तक दुने अज्वःगु कथंया घटना गबले नं पोखराय् जूगु मदुनि ।

अष्टमान प्रधानाङं धयादी कथं थौं सिबें छवाः न्ह्यः पोखराय् तसकं प्वँ वःगु अले मछापुच्छे« हिमाल जःखः च्वापु क्वहां वःगु खःसा उगु च्वापु नायाः मवंनिगु अले म्हिगः व हे च्वापु कुतुंवयाः खुसिइ लाःगु नापं खुसिबाः वःगु खः धकाः नं धयादिल ।
पोखरां थ्यंमथ्यं २० किलोमिटर उत्तरपाखे तातोपानी बजार लाः । पोखरा विमानस्थलया वरिष्ठ अधिकृत अनुप जोशीं माछापुच्छ«ेपाखे ब्ययाच्वंगु जहाजं च्वापुगुँ नायाः बाः वयाच्वंगु खँ पोखराय् खबर यायेगु ज्या जूगु खः ।

अले अनया संचारमाध्यमतपाखें सूचं बिइगु ज्या जूगु खः । उगु घटनालिपा उद्धार यायेगु नितिं हेलिकप्टर तकं परिचालन याःगु खः । अझ नं अप्वः मनूत सीगु दयेमाः धकाः प्रहरीं अनुमान याःगु दु ।