संघर्ष समितियात सक्रिय याये

थीथी घटकत दुथ्यानाच्वंगु नेवाः स्वायत्त राज्य संघर्ष समितियात आः सक्रिय यायेमाःगु दु । समिति सक्रिय जूसा जक नेवाः स्वायत्त राज्यया ग्यारेन्ती जुइ, मखुसा शीर्ष दलया शीर्ष नेतातय्सं नेवाः स्वायत्त राज्यया म्हगस क्यनाः अज्ज नं धों लायेफु । संस्थाया सक्रियतायात निरन्तरता बियां च्वनेमाः । गुकी विवाद मदु । संस्थाय् थीथी घटकत मध्ये छगू सशक्त घटक एकीकृत नेवाः राष्ट्रिय मुक्ति मोर्चा खः । पार्टी विभाजनया भ्mवलय् मोर्चा नं विभाजित जुइधुंकूगु दु । विभाजित मोर्चा मध्ये पुलांगु मोर्चाया प्रतिनिधितय्गु जक मुंज्याय् सःतेगु व न्हूगु अधिवेशन यानाः वःगु न्हूगु ज्यासना पुचःयात समितिइ प्रतिनिधित्व याकूगु मदुनि । मोर्चा विभाजित जुइधुंकाः समितिं भ्याः हे पहल मयासे मस्यू पह छु, मखं पह छु यानाः च्वनेगु धयागु बांलाःगु खँ मखु ।

संघर्ष समितियात सक्रिय यायेगु झ्वलय् थीथी घटक नं अन दुथ्यानाच्वंगु दु । पार्टी वा बिचाःया रुपय् प्रतिनिधित्व जुयाच्वंगु थीथी घटकत मात्रै घटकया रुपय् जक नालेगु स्वयाः उगु घटकया सांगठनिक स्वरुप, विधान व सक्रियतायात नं ध्यान बीगु यायेमाः । मात्रै नां जक कयाः जिपिं फलाना पार्टीनाप संलग्न, फलाना बिचाः नाप सत्तिइ जक धयां घटकया रुपय् मान्यता बीगु सही मखु । घटकया सांगठनिक रुप मदु, सांगठनिक स्वरुप मदु, विधान मदु, अले अन्तरिम रुपं खास सक्रियता नं मदुसा, अज्वःगु घटकयात घटकया रुपय् तयाः संघर्ष समितियात गबलें नं सक्रिय यायेफैमखु । कमसेकम संगठनया अस्तित्व माः । संगठनया अस्तित्व हे मदुगु घटक सही अर्थय् घटक कम व भागबन्दाय् जक सहभागिता याकेगु ज्यां निश्चितरुपं समितियात क्वातुइकी मखु ।

मोर्चा विभाजित जुइवं पुलांगु मोर्चाया पासापिनिगु उपस्थितिइ सीमित जुयाच्वंगु समितियात सक्रियता यायेगु सम्भव मदु । वैचारिकरुपं सशक्त व क्रान्तिकारी समूहपाखें जक समितियात सही निर्देशन, सही सहभागिता व सही सक्रियता सभ्भव दुगु खं थन लोमंके मज्यू ।

गनतक्क नेवाः स्वायत्त राज्ययात संविधानय् च्वकेगु खँ दु – समितिया सक्रियताय् देतनी । समितियात पुलांगु सांगठनिक स्वरुपय् लिकुंकेगु मानसिकतायात नं त्वःतेमाः । समितिया ग्याःचिकु ल्वचं कयेकाः समितियात सक्रिय यानातयेगु जरुरी जुइ । निस्क्रिय घटक व निस्क्रिय सदस्यतय्गु सहभागितां संगठन न्ह्याइमखु, माः कथं न्ह्याकेगु सम्भव नं मदु । थ्व खँयात ध्यानय् तयाः समितियात न्हूगु स्वरुपय् हिलेगु जरुरी दु । अले जक समितियात थौंया आवश्यकताकथं सक्रिय यानातयेपैm । माःगु इलय् माक्को नेवाः शक्तियात सतकय् क्वकायेपैm । नेवाः स्वायत्त राज्यया नितिं नेवाःतय्त सजग व सतर्क यानातयेफै ।

More Stories Like this