कांग्रेसपाखें संसदया बैठक सःतेत माग
येँ(झीगु स्वनिगः)
प्रमुख प्रतिपक्ष दल नेपाली कांग्रेसं व्यवस्थापिका संसद्या बैठक सःतेत माग याःगु दु । कांग्रेसया संसदीय दलया ज्याकुथिइ म्हिगः बुधवाः च्वंगु मुँज्यां निर्णण यानाः अथे माग याःगु खः । दलतय्गु सहमति कथं हे संविधान निर्माणया प्रक्रिया चीहाकः यायेत अन्तरिम संविधानया धारा ७० संशोधन यायेगु सहमति जुइ धुंकूगु जुयाः आः उकिया नितिं संसदया बैठक याकनं हे सःतेमाःगु माग याःगु दु ।
थ्व हे झ्वलय् प्रधानमन्त्री डा. बाबुराम भट्टराईया नेतृत्वविरुद्ध अविश्वासया प्रस्ताव हयेगु नितिं म्हिगः बुधवाःनिसें हे नेपाली कांग्रेसं सभासद्तय्गु ल्हाःचिं मुंकेगु अभियान न्ह्याकुगु दु । उकिया नितिं कांग्रेसया ३० म्ह सभासद्तय्त ल्हाःचिं तयेगु ज्या जुइ धुंकूगु दु । थकिया नितिं कांग्रेसया उपसभापति नापं संसदीय दलया नेता रामचन्द्र पौडेल, गोपालमान श्रेष्ठ लगायतया नेतात सक्रिय जुयादीगु खः ।
बैठकय् हे कचमच
कांग्रेसं वर्तमान सरकारविरुद्ध अविश्वासया प्रस्ताव तयेत धकाः ल्हाःचिं अभियान न्ह्याकेवं बरिष्ठ नेता शेरबहादुर देउवा पक्षधरं विरोध यायेवं अविश्वास प्रस्तावया पक्ष व विपक्षया दथुइ तसकं विवाद जूगु दु ।
देउवा पक्षं कडा रुपं संंस्थापन पक्षया उगु ल्हाःचिं मुंकेगु अभियानया विरोध यायेवं कचमच जूगु खः । अथे संसदीय दलया बैठकय् हे विवाद जुइवं आः थत्थें हे अविश्वासया प्रस्ताव यंकेगु धकाः मधासे संसदया अधिवेशन सःतकेगु धकाः जक निर्णय जूगु खः धकाः धाःगु दु ।
