विवादित विषययात कयाः संविधानसभाय्

थनिनिसें मतदान

येँ(झीगु स्वनिगः)

न्हूगु संविधान निर्माणया झ्वलय् विवादित जुयाच्वंगु विषययात कयाः अन्ततः थौं विहिवाःनिसें मतदान याइगु जूगु दु । संविधानसभाया मुँज्या १ बजेनिसें न्हूबानेश्वरया संविधानसभाय् सःतातःगु दु । गुलि नं विषययात कयाः मतदान यानाः बहुमतया अधारय् निर्णय यायेमाःगु खः उकिया धलः धाःसा संविधानसभाया संवैधानिक समितिं तयार यायेमाःगु प्रावधान दु । संवैधानिक समितिं तयार याःगु धलखय् बुँदागत रुपं सहलह ब्याकाः मतदानया पाखें बहुमतया आधारय् निर्णय यानाः न्हूगु संविधानया मस्यौदा दयेकेमाःगु संवैधानिक प्रावधान दु ।

संविधानसभाया कूल सभासद्त मध्ये बहुमत मवःगु विषययात कयाः धाःसा हाकनं सहलहया नितिं धकाः संवैधानिक समिति हे यंकेगु कथंया संविधानसभाया नियमावली तकं दलतय्सं संशोधन याये धुंकूगु दु । उकियात न्हूगु कथंया षडयन्त्र यात धकाः नं मनूतय्सं धयाहःगु दु । मूल मूल विषययात कयाः मतदान जुइगु इलय् उपस्थिति मजुयाः बहुमत मदयकेगु षडयन्त्र ब्रम्हुुवादी नेतातय्सं यायेफु धकाः धयाहःगु दु । जेठ १४ गते न्हूगु संविधान जारी यायेगु नितिं आः ई मुक्कं यानाः २५ न्हु जक ल्यं दनिगु अवस्था दुसा संविधानया मस्यौदा दयेकाः जनतायाथाय् मस्यौदा ज्वनाः वनाः जनताया सुझाव कयाः हाकनं संविधानसभाय् हयाः दुई तिहाई बहुमतया आधारय् पारित यायेमाःगु प्रावधान दु ।

संविधानसभाय् मतदान यायेगु ज्या थनिनिसें जुइगु जुयाः एकीकृत माओवादी, नेपाली कांग्रेस, एमाले, मधेसी मोर्चा नापं मेमेगु दलतय्सं अन छु गज्वःगु भूमिका म्हितेगु धकाः थःथःगु कथं तयारी याःगु दुसा आदिवासी जनजाति सभासद्तय्गु दबाव समूह ककसं नं थःगु हे कथं तयारी याःगु दु । उकिं आः संविधानसभाय् विवादित विषयलय् मतदान याइगु इलय् छु जुइगु खः धकाः अप्वःसिनं चासो तयाच्वंगु दु । गुलि नं विषययात कयाः संविधान सभाया संवैधानिक समिति अन्तर्गतया उपसमितिइ शीर्ष नेतातय् दथुइ सहमति जूगु धाःगु विषययात कयाः नं संविधानसभाय् फरक मत वयेवं अज्वःगु विषययात तकं मतदान यानाः निर्णय यायेमालीगु अवस्था दु । उकिं मतदानया ई तसकं ताःहाकः जुइगु संभावना दु धकाः मनूतय्सं धयाहःगु दु । प्रमुख दलया नेतातय्गु दथुइ मूल रुपं राज्यया पुनर्संरचना, शासकीय स्वरुप लगायतया बारे विवाद जुयाच्वंगु दु ।