निन्हुया दुने सहमति मजूसा अविश्वासया प्रस्ताव

येँ(झीगु स्वनिगः)

संविधान निर्माण व राष्ट्रिय सहमतिया सरकार निर्माणया सवालय् निन्हुया दुने सहमति मजुल धाःसा वर्तमान सरकार विरुद्ध व्यवस्थापिका संसदय् नेपाली कांग्रेसं अविश्वासया प्रस्ताव तइगु जूगु दु । कांग्रेसया केन्द्रीय समिति नापं संसदीय दलया संविधानसभाय् च्वंगु मुँज्यां उगु कथं निर्णय याःगु खः धकाः नेपाली कांग्रेसया महामन्त्री कृष्ण प्रसाद सिटौलां जानकारी बियादीगु दु ।

वय्कलं संचारकःमितलिसे खँल्हासें धयादिल ‘मूलतः मुँज्यां संविधान निर्माणया हे केन्द्रीत जुयाः सहलह जुयाः राष्ट्रिय सहमतिया सरकार निर्माणयात तकं नापनापं यंकेगु धकाः सहलह जूगु दु ।’ कांग्रेस केन्द्रीय समिति नापं संसदीय दलया मंकाः कथं म्हिगः मंगलवाः न्हूवानेश्वरया संविधानसभाय् मुँज्या च्वनाः उगु कथं निर्णय याःगु खः । कांग्रेसं बैशाख मसान्त दुने प्रधानमन्त्री भट्टराई नं राजीनामा बिइमाःगु अडान काःगु दु । राजीनामा मबिल धाःसा अविश्वासया प्रस्ताव हयाः जूसां क्वःथलेगु रणनीति दयेकूगु दु ।थ्यंमथ्यं निगू दर्जन सभासद्तय्सं ब्वति कयादीगु उगु मुँज्याय् सभासद्तय्सं कांग्रेसया नेतृत्वय् सरकार दयेके फैगु अवस्था दुसा जक अविश्वासया प्रस्ताव यंकेमाः धकाः सुझाव बियादीगु खः । उगु मुँज्याय् संसदीय प्रणालीइ अडान मकासे प्रत्यक्ष निर्वाचित कार्यकारी नालेत तयार जूगु दुसा राज्य पुनर्संरचनाया सवालय् धाःसा ७ प्रदेशय् हे अडान कायेगु तकं निर्णय याःगु दु । शासकीय स्वरुप लिपा संशोधन यायेफैगु तर प्रदेशत म्हो याये मफैगु बरु अप्वया वनी धकाः कांग्रेसं शासकीय स्वरुपय् लचिलो जुयाः राज्य पुनर्संरचनाया सवालय् धाःसा अडान कायेगु धकाः निर्णय याःगु खः ।

कांग्रेसया केन्द्रीय दुजः मीन विश्वकर्मां संचारकःमितलिसे खँल्हासें धयादिल ‘शासकीय स्वरुप धैगु लिपा संशोधन नं यायेफै तर प्रदेशत धैगु म्हो याये फैमखु बरु अप्वया वनी । दलतय्गु दथुइ सहमति जुल धाःसा प्रत्यक्ष निर्वाचित कार्यकारी यात नं नालेत तयार दु ।’ अथे हे कांग्रेसं फयां फत्तले संविधानसभाय् न्हूगु संविधानया बारे विवादित विषययात कयाः मतदान मयायेगु बरु सहमतिया आधारय् वनेगु खँय् बः ब्यूगु दु धकाः नं कांग्रेसया नेतातय्सं जानकारी बियादीगु दु ।