‘निश्चित इलय् पार्टीइ रुपान्तरण जुइ’
किपू(झीगु स्वनिगः)
एकीकृत नेकपा (माओवादी)या मूछ्याञ्जे रामवहादुर थापा बादलं लोकतान्त्रिक गणतन्त्रं मुलुकय् समस्या समाधान याइमखु बरु अखतं समस्या हयाबिइ धकाः दावी यानादीगु दु ।
म्हिगः सोमवाः किपुलिइ जूगु अखिल क्रान्तिकारीया राष्ट्रिय भेलाय् प्रशिक्षण बिइगु झ्वलय् नेता बादलं क्रान्तिकारी जीवनय् न्हूगु अभियान व न्हूगु योजना कथं भेला यानागु खः धकाः स्पष्ट यानादीगु दु ।
वय्कलं फागुनय् जूगु थःपिनिगु विचार समुहया केन्द्रीय कमिटीया मुँज्यां बैद्य विचार समुहयात संगठनय् रुपान्तरण यानाः यंकेगु अले निश्चित इलय् थ्यंकाः उकियात क्रमभंग यायेगु निर्णय जूगु खँ न्ह्यथसें आः निश्चित ई लिपा न्हूगु पार्टी निर्माण यायेगु जुइ धकाः नं धयादिल । उगु भेला प्रशिक्षणात्मक जक खः धकाः नं वय्कलं धयादिल । वय्कलं नेपालय् जुइगु आःया जनवादी क्रान्ति विश्वय् हे न्ह्यथनेबहःगु जुइ धकाः नं दावी यानादिल । उगु भेलाय् माओवादीया स्थायी समितिया दुजः नेत्रविक्रम चन्द विप्लबं नं प्रशिक्षण बियादीगु खः ।
